Hadisə

Lənkəran Mərkəzi Rayon Xəstəxanasında hazırda 4 nəfərin müalicəsi davam edir.

Bu barədə APA-ya Səhiyyə Nazirliyinin mətbuat xidmətindən bildirilib.

Xəbərə görə yaralıların vəziyyəti orta-ağır stabil qiymətləndirilir.

Vəziyyəti ağır qiymətləndirilən və reanimasiya şöbəsinə yerləşdirilən 42 yaşlı qadın isə sanaviasiya ilə Respublika Neyrocərrahiyyə xəstəxanasına çatdırılıb. Xəstə dərhal əməliyyat olunub. Vəziyyəti ağır olaraq qalır.

***

29 avqust, saat 16:00

Lənkəranda baş vermiş yol qəzasında xəsarət alan 5 nəfərin hazırda xəstəxanada müalicəsi davam edir.

Bu barədə APA-ya Səhiyyə Nazirliyindən bildirilib.

Onlardan biri reanimasiyada, digər 4 nəfər isə travmatologiya şöbəsində palatadadır.

***

09:01

Lənkəranda baş vermiş avtoqəza nəticəsində xəsarət alanlardan 10 nəfər xəstəxanada qalacaq, digərləri isə ambulator müalicəyə buraxılır.

APA xəbər verir ki, bu barədə Səhiyyə Nazirliyinin yaydığı məlumatda deyilir.

Məlumata görə, qalan 10 nəfərdən ikisi Reanimasiya şöbəsindədir. Reanimasiya şöbəsinə yerləşdirilən iki qadından birinin vəziyyəti kritik kimi qiymətləndirilir.

Baş həkimin sözlərinə görə, açıq kəllə-beyin travması alan 42 yaşlı qadın komadadır. Reanimasiya şöbəsində müalicə alan digər qadının diaqnozu qapalı kəllə-beyin travması və qabırğa sınığıdır. Vəziyyəti ağırdır.

Travmatologiya şöbəsində müalicə alan 8 qadının vəziyyəti orta ağır kimi qiymətləndirilir. Həyatları üçün təhlükə yoxdur.

***

Saat 22:01

Lənkəranda baş vermiş ağır yol qəzası nəticəsində ölən və xəsarət alanların adları məlum olub.

APA-nın cənub bürosunun məlumatına görə, sürücü - 1957-ci il təvəllüdlü Ələmdar Şahvəli oğlu Ağayev hadisə yerində dünyasını dəyişib.

Qəza nəticəsində daha 22 nəfər - 1949-cu il təvəllüdlü Rəfiqə Ağayeva Miri qızı, 1957-ci il təvəllüdlü Rəisə Sadıqova Canəli qızı, 1957-ci il təvəllüdlü Mirələm Quliyev Baloğlan oğlu, 1964-cü il təvəllüdlü Aytəkin Qasımova İsaq qızı, 1966-cı il təvəllüdlü Adilə Rəhimova Məmmədağa qızı, 1972-ci il təvəllüdlü Südabə Muradova Muxtar qızı, 1972-ci il təvəllüdlü Şölə İbrahimova Filağa qızı, 1974-cü il təvəllüdlü Məryəm Ağayeva Məzahir qızı, 1977-ci il təvəllüdlü Pərvanə Seyfullayeva Vahab qızı, 1978-ci il təvəllüdlü Sevinc Ağayeva Vəliağa qızı, 1981-ci il təvəllüdlü Sevda Yusubova Şirəli qızı, 1982-ci il təvəllüdlü Hafiz Ağayev Allahverdi oğlu, 1983-cü il təvəllüdlü Kifayət Muradova Xeyrulla qızı,
1984-cü il təvəllüdlü Göyçək Əliyeva Mehrəli qızı, 1990-cı il təvəllüdlü Şəfəq Zamanova Cəsail qızı, 1997-ci il təvəllüdlü Milana Cəfərli Qılman qızı, 2001-ci il təvəllüdlü Səbinə Hüseynova Rizvan qızı, 2001-ci il təvəllüdlü Sevgiyyə Ağayeva Əzim qızı, 2004-cü il təvəllüdlü Ülviyyə Ağayeva Əzim qızı, 2006-cı il təvəllüdlü Aycan Yusubova Məhərrəm qızı, 2008-ci il təvəllüdlü Rahim İbrahimov Şamməd oğlu və 2013-cü il təvəllüdlü Yusif Novruzov Zamin oğlu xəsarət alaraq xəstəxanaya yerləşdirilib.

Lənkəranda baş verən yol-nəqliyyat hadisəsi barədə Səhiyyə Nazirliyi də məlumat yayıb. Məlumatda bildirilir ki, qəza nəticəsində sürücü yerindəcə dünyasını dəyişib. 24 nəfər müxtəlif xəsarətlərlə Lənkəran MRX-ya çatdırılıb. Onlardan 23-ü Travmatologiya şöbəsinə, bir nəfər qadın isə ağır vəziyyətdə Reanimasiya şöbəsinə yerləşdirilib.

***

Saat 21:01

Lənkəranda sərnişin daşıyan avtobusun aşması nəticəsində bir nəfər ölüb, daha 22 nəfər xəsarət alıb.

APA-nın cənub bürosunun verdiyi məlumata görə, bədbəxt hadisə rayonun Bəliton kəndində baş verib. İlkin məlumata əsasən, "PAZ" markalı sərnişin avtobusunun əyləcində olan nasazlıq səbəbindən nəqliyyat vasitəsi yoxuşdan geriyə gedərək yaşayış evinin həyətinə aşıb.

Hadisə nəticəsində sürücünün dünyasını dəyişdiyi, xəsarət alanların sayının isə 22 nəfərə çatdığı bildirilir.

Hadisə yerinə FHN-in xilasediciləri cəlb olunub. Yaralılar təcili tibbi yardım və kənd sakinlərinin maşınlarının köməyilə Lənkəran Rayon Mərkəzi Xəstəxanasına gətirilib.

Faktla bağlı araşdırma aparılır.