İncəsənət

Ana səhifə

İncəsənət

“Bakı gecələri” mahnı müsabiqəsi qaliblərinin qala-konserti keçirilib

25 dekabr 2008 09:51 (UTC +04:00)

Bakı. Ülkər Qasımova-APA. Dekabrın 24-də Heydər Əliyev Sarayda Bakı şəhər Mədəniyyət və Turizm İdarəsinin keçirdiyi “Bakı gecələri” mahnı müsabiqəsi qaliblərinin qala-konserti keçirilib. APA-nın məlumatına görə, konsertdə bir neçə aydır davam edən mahnı müsabiqəsinin müxtəlif nominasiyalarında qalib gəlmiş mahnılar ifa olunub. Müsabiqədə “Ən yaxşı oranjeman” nominasiyasında bəstəkar İqbal Ağayevin “Bu gecə” mahnısına görə Nazim Əhmədov və bəstəkar Gövhər Həsənzadənin “Mən səni sevdim” mahnısına görə Yaşar Baxış, “Ən yaxşı səhnə mədəniyyəti” nominasiyasında “Qayıt gəl” (ifaçı – Bəyimxanım Mirzəyeva), “Yolunu gözləyirəm»”(ifaçı - Xəlil Niftəliyev) və “Sevgilim” (ifaçı – Rahidə Baxışova) mahnıları, “Ən yaxşı qadın müğənni” nominasiyasında gənc müğənnilər Mətanət Əsədova (“Gülüm, səni itirməkdən qorxuram”) və Gülay Qədirova (“Doya bilmədim”), “Ən yaxşı kişi müğənni” nominasiyasında Emin Nəsirli (“Yar”), Qismət Məmmədzadə (“Sənsizlik acısı”) və Eldəniz Məmmədov (“Nəzərindən salma məni”) qalib seçiliblər.

“Ən yaxşı mahnı mətni” nominasiyasında “Mən bu ayrılığın başına dönüm”, “Taledən küsərəm” və “Həsrət nəğməsi” mahnılarının mətnlərini yazmış Bəxtiyar Qaraca, Dilarə Şahid və Qənirə Paşayeva, “Ən yaxşı bəstəkar mahnısı” nominasiyasında isə Kamalın “Sənə də qar yağarmış”, Reyhan Hacızadənin “Kaş ki”, Tahir Əkbərin “Sən deyilmisən” və Sevda Məmmədlinin “Yar bizə qonaq gələcək” mahnıları mükafata layiq görülüb. Bundan əlavə, Gövhər Həsənzadənin “Mən səni sevdim” mahnısı (oranjeman – Yaşar Baxış, ifaçı – Ramal Əlizadə) “Tamaşaçı rəğbəti” nominasiyasında qalib gəlib.

Elşən Nicatın “Həsrət nəğməsi” (ifaçı – Cümşüd Abdullayev) mahnısı “Bakı gecələri”ni digər mahnı müsabiqələrindən fərqləndirən nominasiyada – “Ən zəif mahnı” nominasiyasında qalib elan edilib. “Bakı gecələri” mahnı müsabiqəsinin Qran-pri mükafatına “Taleyim” mahnısı (bəstəkar – Eldar Mansurov, şair – Pənah Rüstəm, oranjeman – Nazim Əhmədov, müğənni – Cəlal Abbasov) layiq görülüb.

Qeyd edək ki, “Bakı gecələri” müsabiqəsinin münsiflər heyətində Oqtay Rəcəbov, Mübariz Tağıyev, Natəvan Şeyxova, Mənzər Nurəliyeva, Bəxtiyar Xanızadə, Qulu Ağsəs, Azad Şükürov təmsil olunublar.