Sosial

Ana səhifə

Sosial

Azərbaycanda bütün evlərin asbest şiferli dam örtükləri dəyişdiriləcək

05 aprel 2012 10:53 (UTC +04:00)

Bakı. Elvin Yaqubov, Zahid Abışov, Kəmalə Quliyeva-APA. Azərbaycanda evlərin, sosial obyektlərin asbest şiferli dam örtükləri dəyişdiriləcək. APA-nın məlumatına görə, bununla bağlı Azərbaycan Nazirlər Kabineti (NK) yerli icra hakimiyyəti orqanlarına xidməti məktub göndərib. Artıq Kürdəmir, Ağsu, Göyçay, Şamaxı, Ucar rayonlarında damı asbest şiferlə örtülmüş fərdi yaşayış evlərinin, sosial obyektlərin dəqiq sayının müəyyən edilməsi üçün siyahıya alma işləri görülür.

Kürdəmir rayon icra hakimiyyəti başçısının birinci müavini, rayon fövqəladə hallar komissiyasının sədri Vasif Məmmədov APA-nın yerli bürosuna bildirib ki, artıq bir neçə gündür asbest örtüklü evlərin siyahıya alınması və onların dam örtüklərində ölçü işləri aparılır: “Kürdəmir şəhərində və 61 kənddə asbest örtüklü evlərin dəqiq sayı yaxın bir həftə ərzində məlum olacaq. Niyə məhz asbest örtüklü evlərin qeydiyyata alınmasının dəqiq səbəbini bilmirik. Ola bilsin ki, həmin materiallar insan sağlamlığı üçün ziyanlıdır. Amma dam örtüklərinin dəyişdiriləcəyi və ya bununla bağlı vətəndaşlara hansı yardımların veriləcəyi barədə məlumatımız yoxdur. Sadəcə belə evləri siyahıya alırıq və dam örtüklərinin eni və uzunluğu ölçülərək neçə kvadrat olduğu müəyyənləşdirilir”.

Rayonun Çöhranlı kəndi üzrə icra nümayəndəsi Fərman Həmidov APA-ya bildirib ki, kənddə evlər siyahıya alınıb və məlumat icra hakimiyyətinə təqdim olunub: “Çöhranlı kəndində mövcud olan 245 fərdi yaşayış evindən 155-nin dam örtüyünün asbest örtüklü olduğu müəyyən edilib və ölçüsü aparılıb. Kənd icra nümayəndəliyinin və bələdiyyənin yerləşdiyi bina, məktəb və klub da həmin siyahıya daxil edilib. Belə tikililərin nə üçün siyahıya alındığını bilmədiyimizə görə bununla bağlı vətəndaşların suallarına da konkret cavab verməkdə çətinlik çəkirik”.

Ağsu rayon İcra Hakimiyyəti başçısının müavini, rayon fövqəladə hallar komissiyasının sədri İqbal Mikayılov APA-ya bildirib ki, rayon mərkəzində və 78 kənddə siyahıya alma və ölçü işləri aparılır. O, hazırda Nazirlər Kabinetinin xidməti məktubuna əsasən bu istiqamətdə verilən tapşırığın icra olunduğunu və bunun səbəbinin açıqlanmadığını bildirib.

Ucar rayonunda da asbest şiferli tikililərin siyahıya alınmasına başlanıb. Ucar rayon icra hakiminin birinci müavini, rayon fövqəladə hallar komissiyasının sədri Əbil Mehdiyevin APA-ya verdiyi məlumata görə, Nazirlər Kabinetinin göstərişinə əsasən, rayonda dam örtüyü asbest şiferdən olan bütün tikililərin aprel 1-dən siyahıya alınmasına başlanıb. Siyahıya alınma yerli icra nümayəndəlikləri tərəfindən aparılır və prosesin ayın 7-nə kimi başa çatdırılması nəzərdə tutulur. Siyahıya alınmanın hansı məqsədlə aparılması barədə hələlik rəsmi orqanlar heç bir açıqlama vermir. Yerli sakinlər isə radiasiya ilə əlaqədar olaraq asbest şiferlərin yeni dam örtüyü ilə əvəz olunacağını deyir.

Hökumətdəki mənbələrdən APA-ya verilən məlumata görə, asbest örtüklü damların dəyişdirilməsi məsələsi həqiqətən də gündəmdədir. Lakin hələlik bununla bağlı hökumətin rəsmi qərarı yoxdur, sadəcə ilkin təhlillər və araşdırmalar aparılır. Məlumata əsasən, bu layihə kifayət qədər böyük vəsait tələb edir. Amma Azərbaycanın qoşulduğu beynəlxalq konvensiyalar, o cümlədən Avropa Sosial Xartiyası qarşısında müəyyən öhdəlikləri var. Mənbə onu da bildirib ki, artıq respublikada asbest şiferlərin istehsalı aparılmır.

Azərbaycan Milli Elmlər Akademiyası (AMEA) Radiasiya Problemləri İnstitutun direktoru Adil Qəribov APA-ya açıqlamasında bildirib ki, asbest şiferlər günəş altında azot tərkibli kanserogen, zərərli maddələr buraxır: ”Beynəlxalq səviyyədə ekspertlərin müəyyən etdiyi belə bir tibbi nəticə var ki, bu maddələr xərçəng xəstəliklərini stimullaşdırır. Ona görə də dünya miqyasında inkişaf eləmiş ölkələrin çoxunda asbest şiferlərdən istifadəyə məhdudiyyət qoyulub. Azərbaycan da inkişaf etmiş ölkə sayılır. Ona görə də asbest şiferlərin yaratdığı problem gündəmə gəlib”.

dam_örtüyü