ADA Universitetində əfqanıstanlı diplomatlar üçün kurs keçirilir

ADA Universitetində əfqanıstanlı diplomatlar üçün kurs keçirilir
# 08 iyun 2021 12:57 (UTC +04:00)

Azərbaycan Respublikasının Beynəlxalq İnkişafa Yardım Agentliyinin (AIDA) dəstəyi ilə ADA Universitetində əfqanıstanlı diplomatlar üçün nəzərdə tutulmuş “Xarici Siyasət Proqramı” başlayıb. 

Azərbaycan Xarici İşlər Nazirliyinin Mətbuat xidməti idarəsindən APA-ya verilən xəbərə görə, iki həftə davam edəcək kursun keçirilməsində əsas məqsəd gənc diplomatlara fəaliyyət göstərdikləri sahələr üzrə nəzəri və praktiki biliklərin aşılanması, onlarda idarəçilik və liderlik qabiliyyətini yüksəltməklə ümumilikdə insan kapitalının inkişaf etdirilməsindən ibarətdir. 

Kurs dövründə iştirakçılar ADA Universitetinin peşəkar professor-müəllim heyəti, eləcə də dövlət və hökumət qurumlarının təcrübəli mütəxəssislərindən beynəlxalq siyasət, diplomatik fəaliyyət, sosial-iqtisadi, enerji və digər məsələlər üzrə mühüm biliklər əldə edəcəklər. Diplomatlar həmçinin 44 günlük Vətən Müharibəsi dövründə ölkəmizin əldə etdiyi beynəlxalq siyasi və hərbi uğurları, terrorçuluqla mübarizə və ictimai təhlükəsizliyin təmin edilməsi, həyata keçirilmiş iqtisadi inkişaf modeli və yoxsulluğun aradan qaldırılması, korrupsiya ilə mübarizə və effektiv idarəçilik üzrə mühazirələrin dinləyiciləri olacaqlar. İştirakçılar ölkəmizin tarixi, siyasəti, coğrafiyası və mədəniyyəti barədə geniş məlumat əldə edəcəklər. Kursu müvəffəqiyyətlə bitirənlər müvafiq sertifikatlarla təmin olunacaqlar. 

Qeyd olunub ki, AIDA-nın ADA Universiteti ilə 2018-ci ildən birgə təşkil etdiyi “Xarici Siyasət Proqramı”nda indiyədək 20-dən artıq İslam Əməkdaşlıq Təşkilatı, Qoşulmama Hərəkatı və Beynəlxalq Frankofoniya Təşkilatına üzv olan Asiya və Afrika ölkələrindən 70-yə yaxın diplomat müxtəlif ixtisaslar üzrə biliklər əldə edib və hazırda öz ölkələrinin dayanıqlı inkişafında yaxından iştirak etməklə yanaşı, vətənləri ilə Azərbaycan arasında da etibarlı və dost körpü rolunu oynayırlar.

#
#

ƏMƏLİYYAT İCRA OLUNUR