İnfrastruktur

Azərbaycanda “Aston Martin” şirkətinin rəsmi nümayəndəliyi olan “Avtolux Azərbaycan” MMC ən son “Aston Martin DB11” modelini ölkəmizin avtomobilsevərlərinə təqdim edib.

“APA-Economics” xəbər verir ki, “Aston Martin” üzrə brend menecer Tural Xancığazov və şirkətin satış üzrə regional meneceri Sidi Larbi Bensoudanın da iştirakı ilə keçirilən avtomobilin təqdimat mərasimində bildirilib ki, istehsal edilən ilk 1000 avtomobildən biri olduğu üçün təqdim olunan məhz bu DB11-in keyfiyyətinə “Aston Martin” şirkətinin rəhbəri Endi Palmer tərəfindən şəxsən zəmanət verilib.

“Aston Martin” üzrə brend menecer T.Xancığazov təqdimat zamanı qeyd edib ki, 1913-cü ildə yaranmış “Aston Martin” brendi 2013-cü il etibarilə yeni yüzilliyə qədəm qoyub və 86-cı Cenevrə Avto Sərgisində DB11 modelinin təqdimatı ilə şirkətin “İkinci Əsr” strategiyasına start verilib.

“Yeni DB11 modeli innovativ dizayn elementləri ilə forma və funksiyanallıq arasındakı əlaqəni yenidən tərif edir. Dizayn yeniliklərinin arasında ən çox gözəçarpanları öndən bərkidilmiş balıqqulağı formalı kapot, səciyyəvi LED faralar, eləcə də Aston Martin-in ənənəvi radiator barmaqlığının diqqəti özünə cəlb edən cizgiləridir. Əvvəldən sona qədər bütöv xətt formasında davam edən yan tərəfin görünüşü də heç də ön görünüşdən geri qalmır. Səlis xətlər arxa işıqlara qədər davam edir və təkrar olunmaz bədii obraz yaradır. DB11-in hamar səthinə xələl gətirmədən, hava axınının həm gövdənin üzərindən, həm də altından ağıllı nizamlanması nəticəsində stabilliyi təmin edən yenilikçi aerodinamika estetik inqilabda öz rolunu oynayır. Qəlsəməvari qıvrımlar aerodinamik qanadlarda yığılmış hava təzyiqini yenidən dizayn olunmuş yan zolaqdan xaric edərək maşının ön hissəsini yerə sıxarkən, eyni funksiyanı maşının arxa hissəsində gizli hava qəbuledicilərinin köməkliyi ilə Aston Martin AeroBlade yerinə yetirir. Digər bütün “Aston Martin”lər kimi, DB11-in də ürəyi onun kapotunun altındadır, onu digər “Aston Martin”lərdən fərqli edən isə 5,2 litrlik iki - turboüfürməli V şəkilli 12 silindrli mühərrikli olmasıdır. 600 at gücü və 700Nm burucu momenti DB11-i bu günə qədər istehsal edilmiş ən güclü DB modeli edir. Təəccüblü deyil ki, bu göstəricilərlə o həm də ən çevik və dinamikdir: 322 km/saat maksimal sürət və 3,9 saniyəyə 0-100 km sürətlənmə. İntelektual silindir aktivləşdirmə və Start/Stop düymələri sayəsində o həm də çox effektivdir”, - deyə T.Xancığazov vurğulayıb.

Bundan başqa, sürücü tərəfindən seçilə bilən dinamik idarəetmə modları (GT, Sport və Sport Plus), səkkiz pilləli avtomatik ZF sürət qutusu, arxa oxda quraşdırılan özükilidlənən differensial və dartma vektoruna nəzarət edən sistemlərin yaratdığı ahəngin nəticəsi nümunəvi rahatlıq və həqiqi sport avtomobili cəldliyidir.

Əsl XXI əsr “Aston Martini” olaraq DB11, “Daimler AG”i ilə texniki tərəfdaşılığı nəticəsində ən son texnologiya, ən yaxşı keyfiyyət və ən incə sənətkarlığı özündə birləşdirir. Tam rəngli 12 düymluq TFT LCD ekran vasitəsi ilə, tamamilə yenilənmiş cihazlar paneli mütləq dəqiqliklə avtomobil haqqında ən vacib məlumatı sürücüyə ötürür. İkinci 8 düymluq TFT ekran isə əyləncə sistemi üçün nəzərədə tutulub. İntuitiv nəzarət sisteminə müştərinin tələbinə bağlı olaraq, şəxs tanıma, multi toxunuş və jest dəstəyi, peyk naviqasiya və güclü audio sistem, yeni tətbiq olunan avtomatik park köməkçisi və 360 dərəcəli video görüntü də əlavə etmək mümkündür.

“Aston Martin DB11” artıq bir neçə mükafat qazanıb, onların arasında ən əlamətdarları Fransanın “L`argus Oxucuların Seçimi” mükafatı, “T3 İlin Dizaynı”, Almaniyanın prestijli “Autonis” mükafatı, İtalyanın “Salone dell’ Auto”da təqdim olunan Avtomobil Dizaynı mükafatlarıdır.