Bakı-APA. Rəsmi Tehran və Tiflis arasında Gürcüstana 200 mln. kubmetr həcmində qazın tədarükünə dair danışıqlar aparılır. APA-nın “TASS”a istinadən verdiyi xəbərə görə, bu barədə ötən gün İran Milli Qaz İxracı Şirkətinin (NIGEC) direktoru Əlirza Kaməli Tehranda İranın neft naziri Bijan Namdar Zanqane və Gürcüstanın energetika naziri Kaxa Kaladze arasında keçirilən danışıqlardan sonra bildirib.
“Gürcüstanın dövlət və özəl sektorunun müəssisələri İranda qaz tədarük edilməsində maraqlıdırlar”, deyə Kaməli bildirib. “Qazın Gürcüstana tədarükünün növbəti ildən (Hicri-Qəməri təqvimi ilə martın 21-dən sonra) başlanacağı gözlənilir” - deyə iranlı nazir əlavə edib.
Onun sözlərinə görə, 7 ay müddətinə imzalanacağı nəzərdə tutulan ilk sazişin bu sahədə sonrakı əməkdaşlıq üçün baza olacağı gözlənilir: “Bundan başqa, Gürcüstan İran qazının Ermənistan ərazisindən nəql olunması üçün bu ölkədən qazın tranzitinə dair razılıq almalıdır. Sövdələşmənin məqsədəuyğunluğu təsdiqlənəcəyi təqdirdə, gələcəkdə söhbət artıq Gürcüstana qaz tədarükünə dair orta və uzunmüddətli sazişlərdən gedə bilər”.
Qeyd edək ki, hazırda Gürcüstanın istehlak etdiyi qazın 88 faizi Azərbaycandan, 12 faizi isə Rusiyadan tədarük olunur. Gürcüstan Rusiyadan qazı tranzit haqqı kimi alır (ərazisi üzərindən Ermənistana qazın nəql olunmasına görə).
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
