Mədəniyyət siyasəti

Ana səhifə

Mədəniyyət siyasəti

Qaytana: “Sakinlərinizin nəvazişi və qonaqpərvərliyi sözün əsl mənasında məni valeh etdi” – MÜSAHİBƏ - FOTOSESSİYA

Qaytana: “Sakinlərinizin nəvazişi və qonaqpərvərliyi sözün əsl mənasında məni valeh etdi” – <font color=red>MÜSAHİBƏ - FOTOSESSİYA</font>

16 may 2012 07:40 (UTC +04:00)

Bakı. Ülkər Rəşidqızı - APA. “Eurovision-2012” mahnı müsabiqəsində Ukraynanı təmsil edən Qaytananın APA-ya eksklüziv müsahibəsi.

- Bakıya ilk dəfə gəlirsiniz. Bundan öncəki müsahibələrinizdə Bakını görmək arzusunda olduğunuzu bildirmişdiniz. Artıq burdasınız və Bakı sizə necə təsir bağışladı?

- Şəhəriniz olduqca gözəldir. Hələ təyyarədə ikən fotokamera ilə gördüklərimi lentə almağa başladım. Yolboyu insan əli ilə yaradılmış gözəllikləri izləyərək heyrətə gəldim. Elə bil nağıllar aləminə düşmüşdüm. Məni ən çox cəlb edən isə Bakının rəngi oldu. Ağ, çəhrayı, sarı və kök rənglərinin qarışığından ibarət rəng insana sakitləşdirici təsir göstərir. Özümü paytaxt şəhərdə deyil, əksinə, hansısa bir kurortda hiss etdim. Boş vaxt tapan kimi elə bu gün milli mətbəxinizi dadmağa gedəcəyəm. Əminəm ki, mətbəxiniz olduqca zəngin və ləzzətlidir.

- Bakı sakinləri barədə təəssüratlarınız necədir?

- Bura gələnə qədər düşünməzdim ki, mənim kimi gülümsəməyi bu qədər sevən insanlar ola bilər. Sakinlərinizin nəvazişi və qonaqpərvərliyi sözün əsl mənasında məni valeh etdi. Bir də isti və mülayim hava şəraiti ilə əlaqədar zəif tünd rəngli dəriləri məni ən çox cəlb edən amillərdən oldu.

- “Baku Crystal Hall” səhnəsində artıq ilk məşqiniz baş tutub.

- Əlbəttə, hər şey əla oldu demək bir qədər banal səslənir, amma həqiqətən də belə oldu. Səhnədəki hər üç məşqim uğurlu keçdi. Bu cür səhnə və zaldan başqa şey gözləmək düzgün olmazdı.

- İkinci yarımfinal səhnəsindəki çıxışınız zamanı güldən hörülmüş baş geyimindən istifadə edəcəksinizmi?

- Düşünürəm ki, bəli. Çünki bu cür aksessuarları çox sevirəm. Özümlə Bakıya güldən hörülmüş bir neçə baş geyimi gətirmişəm.

- Səhnədəki çıxışınız zamanı bek-vokallardan imtina etmisiniz. Bunun səbəbi nədir?

- Düzdür. Düşünürəm ki, əgər tamaşaçılar ifam zamanı mənimlə birgə ifa etsələr, lap əla olar. Bildiyiniz kimi, mənim atam Konqo əsillidir. Ona görə də Afrika ritmlərini çox sevirəm. “Eurovision-2012” səhnəsində ifa edəcəyim “Be my Guest” mahnısında da bu cür ritmlər mövcuddur. Bu ritmləri məhz özüm ifa etmək istədim.

- Eşitmişik ki, Ukraynanı builki yarışmada təmsil edəcəyinizə görə bəzi narazılıqlarla üzləşmisiniz...

- Doğrudur, bəzi narazılıqlar olub. Amma düşünürəm ki, bu cür neqativ halların qarşısını almağın ən gözəl yolu gülümsəmək və insanlara sevgi, müsbət enerji bəxş etməkdir.

- Ani Lorak və Ruslana ilə birgə mahnınız var. Bakıya gəlməzdən öncə onlarla görüşüb, məsləhətlərini almısınızmı?

- Təbii ki. Ruslana bacardığım qədər dincəlməyi və enerjimi əsas günə saxlamağımı, Ani isə əksinə, “Eurovision” ərəfəsindən həzz almağımı məsləhət bildilər. Ümidvaram ki, Ukraynaya onların nail olduqları uğuru yenidən bəxş edə biləcəyəm.

- Favoritiniz kimdir?

- Təmsilçilərin hamısının ifasını dinləmişəm. Mübarizə çətin olacaq. Demək olar ki, bütün iştirakçılar güclü səsə malikdirlər. Digər bir fakt isə “Eurovision-2012” səhnəsində bir çox musiqi janrlarının yer alması builki müsabiqəni daha rəngarəng və eyni zamanda çətin edir.

- “Eurovision”dan sonrakı gələcək planlarınıza nə daxildir?

- Mən daim yeni musiqilər yazıram. Düşünürəm ki, mənim həyat amalım məhz insanlara yeni musiqilər bəxş etməkdir. Eyni zamanda mən uşaqlar üçün də musiqilər yazıram. Bir dostumla bərabər yaxın zamanlarda imkansız, ancaq istedadlı uşaqlar üçün səsyazma studiyası açmaq arzusundayıq.

- Sonda Bakı sakinlərinə sözünüz?

- Əzizlərim, biz böyük bir ailəyik. Gəlin siyasi, dini münaqişələrə məhəl qoymadan hamımız musiqi dostluğu ilə bir araya gələk. Ancaq bu təqdirdə biz bir böyük ailə ola bilərik!