Bakı. Aqşin Rafiqoğlu, Aynur Əliyeva - APA-Economics. “Azərbaycan Dəmir Yolları” QSC Yeni il və Dünya Azərbaycanlılarının Həmrəylik günü ilə əlaqədar yaranacaq sərnişin sıxlığını nəzərə alaraq Bakı-Tiflis istiqamətində turist qatarı buraxacaq.
“APA-Economics”in xəbərinə görə, bunu “Azərbaycan Dəmir Yolları” QSC-nin Mətbuat katibliyinin rəisi Nadir Əzməmmədov bildirib.
Qurum rəsmisi deyib ki, dekabrın 29-dan 31-dək sərnişin sıxlığı gözlənildiyindən Sərnişindaşıma Departamenti hazırda ehtiyatda olan qatarlara texniki baxış keçirib.
“Turist qatarına gəlincə isə o, Bakı-Böyük Kəsik istiqamətində getmək istəyən sərnişinlərə də xidmət edəcək. Bu qatarının qiymətində dəyişiklik olmayacaq. Qiymətlər Bakı-Tiflis qatarına olan qiymətlərlə eyni olacaq”, - deyə o bildirib.