Bakı – APA. Akademik Milli Dram Teatrının kollektivi Zaqatalada qastrol tamaşası ilə çıxış edib. Teatrın mətbuat xidmətindən APA-ya verilən məlumata görə, yaradıcı heyət Zaqatala rayon mədəniyyət evində “Qürbətdən gələn məktublar” tamaşasını nümayiş etdirib.
Həsən Həsənovun eyniadlı əsəri əsasında hazırlanan iki hissəli dramın rejissoru xalq artisti Mərahim Fərzəlibəyovdur.
Səhnə əsərinin quruluşçu rəssamı əməkdar mədəniyyət işçisi İlham Elxanoğlu, musiqi tərtibatçısı Həmid Kazımzadədir. Tamaşada əsas rolları xalq artistləri Ramiz Məlik, Laləzar Mustafayeva, Hacı İsmayılov, əməkdar artistlər Kazım Abdullayev, Əjdər Həmidov, Elşən Cəbrayılov, Vəfa Zeynalova, Elçin Əfəndi ifa edib.
Səhnə əsəri ilk dəfə teatrda 2003-cü ildə rejissor Ramiz Həsənoğlunun quruluşunda “Brüsseldən məktublar” adı ilə səhnəyə qoyulub.
Çağdaş günümüzlə səsləşən tamaşada M.F.Axundzadənin obrazını ilk dəfə xalq artisti Əliabbas Qədirov, daha sonra xalq artisti İlham Əsgərov canlandırıb.
Qeyd edək ki, qastrol səfərlərinin təşkilində məqsəd Akademik Milli Dram Teatrı ilə bölgələrdə yaşayan tamaşaçıların əlaqələrinin daimiliyini təmin etmək, teatrın tamaşalarını bölgələrdə nümayiş etdirmək, regionlarda yaşayan əhalinin asudə vaxtlarını səmərəli təşkil etməkdən ibarətdir.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
