Daxili siyasət

Ana səhifə

Daxili siyasət

Azərbaycan Milli Məclisində “Dini etiqad azadlığı haqqında” qanuna əlavə və dəyişikliklərin müzakirəsi başlanıb

08 may 2009 12:06 (UTC +04:00)

Bakı. Elbrus Seyfullayev - APA. Milli Məclisin bugünkü iclasında Salyan rayonunun Şatrovka kəndinin adının dəyişdirilərək Çadırlı adlandırılması barədə qərar qəbul olunub. APA-nın məlumatına görə, deputatlar, həmçinin “Əmanətlərin sığortalanması haqqında” qanuna əlavə və dəyişikliklər və “Sərhəd mühafizəsinin 90 illiyi” yubiley medalının təsis edilməsi haqqında qanunları da qəbul ediblər.

Bunsan sonra isə “Dini etiqad azadlığı haqqında” qanuna əlavə və dəyişikliklərin müzakirəsi başlanıb. Sənəd haqqında məlumat verən MM-in İnsan haqları komitəsinin sədri Rəbiyyət Aslanova bildirib ki, Azərbaycanda “Dini etiqad azadlığı haqqında” qanun 1992-ci ildə qəbul olunub, indiyə kimi sənədə səkkiz əlavə və dəyişiklik edilib. Komitə sədrinin sözlərinə görə, SSRİ dövründə ölkədə cəmi 18 məscid fəaliyyət göstəribsə, hazırda onların sayı 1750-dir.

R. Aslanova qanuna təklif olunan əlavə və dəyişikliklərdən bir qisminin referendumdan irəli gələn məsələlərlə bağlı olduğunu qeyd edib. Komitə sədri bildirib ki, təklif olunan dəyişikliklərə əsasən, dini qurumlar yalnız dövlət qeydiyyatına alındıqdan sonra fəaliyyət göstərə bilər. Onun sözlərinə görə, layihədə dini qurumlara, yalnız dövlət qeydiyyatına alınması üçün təqdim olunan ünvanda fəaliyyət göstərməyə icazə verilir.

Müzakirələr zamanı çıxış edən millət vəkili İqbal Ağazadə deyib ki, Azərbaycanda sağlam dini məktəblər olmalıdır: “Bugünkü dini məktəblərin arxasından isə nurçuluq, vəhhabilik və digər missioner fəaliyyətlə məşğul olan din cərəyanlar çıxır. İranın, Ərəbistanın təsiri altında olan dini icmalar var”.

Deputat Zahid Oruc isə layihə barədə danışarkən Azərbaycanda məscidlərin minarələrində azanın səsgücləndiricilərlə verilməsinə limit qoyulsa da, kilsə zənglərinə bu məhdudiyyətin tətbiq edilməyini bildirib: “Bu isə paradoksallıq yaradır”.

Millət vəkili Mübariz Qurbanlı isə qanunun daha da sərt olmasını, digər müddəalara da əlavə və dəyişikliklər edilməsini təklif edib.

Lakin deputat Pənah Hüseyn əlavə və dəyişikliklərin Azərbaycanda missionerliyin qarşısını almayacağını deyib: “Bu dəyişiklik ateistliyə xidmət edir. Azərbaycanda dini qorumaq lazımdır”.

Millət vəkili Fazil Mustafa isə İslamda ziyarətgah anlayışının olmadığını, yeganə müqəddəs yerin Kəbə olduğunu qeyd edib: “İslam dininə qarşı diskriminasiya meyləri güclənməkdədir. Biz İslama sahib çıxmalıyıq. Ekstremizmə qarşı isə mübarizə aparılmalıdır”.

Müzakirələr günün ikinci yarısında davam etdiriləcək.

din