Daxili siyasət

Ana səhifə

Daxili siyasət

Azərbaycan prezidenti əvvəllər “Binə” və “Sədərək” ticarət mərkəzlərinin yerləşdiyi əraziyə baş çəkib

19 may 2009 15:13 (UTC +04:00)

Bakı – APA. Azərbaycan prezidenti İlham Əliyev mayın 19-da Aeroport kəsişməsində yol qovşağının, Heydər Əliyev Beynəlxalq Hava Limanı - Bilgəh qəsəbəsi avtomobil yolunun və piyada keçidlərinin tikintisi ilə tanış olub. Prezidentin mətbuat xidmətindən APA-ya verilən məlumata görə, prezidentə yolun texniki göstəriciləri barədə məlumat verilib.

Bildirilib ki, yolun ümumi uzunluğu 19 kilometrdir. Əsas yolda 6, köməkçi yolda isə 2 hərəkət zolağı var. Hərəkət zolaqlarının eni 3,75 metrdir. Asfalt-beton örtüklü yolun ümumi sahəsi 822 min kvadratmetr, asfalt-beton örtüyünün qalınlığı isə 270 mm olacaq.

Qeyd olunub ki, yolda hərəkətin tənzimlənməsi üçün Aeroport kəsişməsində müxtəlif səviyyəli yol ötürücü qovşağın və 5 yerüstü piyada keçidinin tikilməsi nəzərdə tutulur. Aeroport kəsişməsindəki körpü 8 hərəkət zolaqlı olmaqla, uzunluğu 127 metr, sahəsi isə 5080 kv/m-dir. Burada drenaj sisteminin və ehtiyat boru keçidlərinin inşası da nəzərdə tutulur.

Tikintinin 20 ay ərzində başa çatdırılacağı bildirilib.

Prezident İ. Əliyev tikintinin vaxtında və yüksək keyfiyyətlə icra olunması ilə bağlı tapşırıq və tövsiyələrini verib.

Sonra dövlət başçısı əvvəllər “Binə” və “Sədərək” ticarət mərkəzlərinin yerləşdiyi əraziyə gəlib. Prezident İlham Əliyev burada aparılan abadlıq və quruculuq işləri ilə də tanış olub, ərazinin yenidən qurulmasının yüksək səviyyədə həyata keçirilməsi ilə əlaqədar müvafiq tapşırıqlar verib.