Daxili siyasət

Ana səhifə

Daxili siyasət

ACP sədrinin müavini: “Sədrimiz Akif Şahbazov hazırda rayonda kənd təsərrüfatı işləri ilə məşğuldur”

21 may 2009 15:01 (UTC +04:00)

Bakı. Elnur Məmmədli-APA. “Açıq Cəmiyyət Partiyasının fəaliyyətini dayandırmaq səlahiyyəti partiyanın lideri Rəsul Quliyevdədir. O da belə bir qərar qəbul etməyib”. Bu açıqlamanı APA-ya ACP sədrinin müavini Fərəməz Cavadov deyib. Onun sözlərinə görə, ACP-nin fəaliyyətini dayandırması ilə bağlı səslənən fikirlər həqiqətəuyğun deyil. F. Cavadov partiyanın iclaslarının yalnız zərurət yarananda keçirildiyini bildirib: “Hər gün biz niyə görə yığışmalıyıq? İndi gərək bizdə də bir fövqəladə iş olsun ki, yığışıb iclas keçirək. Boş-boşuna niyə yığıncaq keçirək?”

ACP sədri Akif Şahbazovun fəaliyyətini dayandırıb - dayandırmaması, hazırda harada olmasına gəldikdə, F. Cavadov bildirib ki, o ya evində olur, ya da Biləsuvar rayonuna gedir: “Biləsuvar paytaxta yaxın yerdir, orada təsərrüfatla da məşğul olur. Nə etməlidir? Bir ara özü xəstə oldu, oğlu əsgərlikdə idi, problemləri vardı. Görünür, buna görə də jurnalistlərə cavab verə bilmir. Amma bu gün Azərbaycandakı digər partiyalarda vəziyyət necədirsə, ACP-də də elədir. Bu gün hansı partiyanın səsi çıxır ki, ACP-nin də səsi çıxsın?”. Partiya sədrinin təsərrüfatla məşğul olmasının nə dərəcədə düzgün olması barədə sualı cavablandıran F. Cavadov burada qeyri-adi bir hal görmür: “Başa düşə bilmirəm o nə etməlidir ki? Bu adamın da məşğuliyyəti budur. Əslində, onun ixtisası kənd təsərrüfatıdır və bununla da məşğul olmalıdır”.

F. Cavadov yay aylarında, ən geci sentyabrında ACP lideri Rəsul Quliyevin Bakıya qayıtmaq ehtimalının olduğunu da qeyd edib: “Bu gün hakimiyyətlə Rəsul Quliyev arasında heç bir problem yoxdur. Onun qarşısına partiyanı fəaliyyətini dayandırmaqla bağlı hər hansı şərt qoyulmayıb. Əgər o belə şərtləri qəbul etsəydi, 95-96-cı illərdə həmin şərtlərlə qalıb işləyərdi. Biz İlham Əliyevin siyasi kursunu dəstəkləyirik. Bu gün müxalifətdə İlham Əliyevə rəqib yoxdur. Yalnız Rəsul Quliyevdir, o da okeanın o tayındadır. Nə İsa Qəmbər, nə Əli Kərimli ona rəqib ola bilməzlər”.

ACP-nin Ali Məclisinin sədri Vaqif Mahmudov da partiyanın fəaliyyətinin dayandırılmadığını deyib. O, APA-ya açıqlamasında bildirib ki, ACP-nin strukturları bugünkü şərtlər daxilində fəaliyyət göstərir: “Ölkədə ümumi siyasi aktivlik yoxdur, heç bir partiyada aktivlik müşahidə olunmur. Partiyanın sədri də fəaliyyətini davam etdirir. Telefonu bir müddət bağlı ola bilər, amma bu, o demək deyil ki, fəaliyyətini dayandırıb”. V. Mahmudov ACP-nin toplantılarının vaxtlı - vaxtında keçirildiyini, hər hansı Nizamnamə pozuntusuna yol verilmədiyini deyib: “Hər gün toplantı keçirməyə ehtiyac yoxdur. Qarşıdan da yay gəlir. Yayın öz, qışın öz funksiyaları var. Əlavə olaraq da siyasi proseslərin gedişinə uyğun olaraq partiyanın fəaliyyəti tənzimlənir. Prezident seçkilərindən sonra da Ali Məclisin iclasları keçirilib. Sadəcə bu iclaslar mətbuata açıq keçirilmir”. F. Cavadovdan fərqli olaraq V. Mahmudov R. Quliyevin Azərbaycana qayıdacağı ilə bağlı hər hansı məlumata malik olmadığını bildirib.