Daxili siyasət

Ana səhifə

Daxili siyasət

Azərbaycanın hakim partiyasının sədr müavini həmsədrləri Ermənistanın mövqeyini dəstəkləməkdə ittiham edir

22 may 2009 10:09 (UTC +04:00)

Bakı. Elbrus Seyfullayev-APA. Milli Məclisin yaz sessiyasının bugünkü növbəti iclasında millət vəkilləri cari məsələlərlə bağlı fikirlərini bildiriblər. APA-nın məlumatına görə, deputat İqbal Ağazadə Azərbaycanda məscidlərin bağlanması haqqında danışaraq, bu işin müəmmalı şəkildə aparıldığını bildirib: “Gizli iş görmək lazım deyil. Gizli görülən iş ajiotaj yaradır”.

Parlamentin vitse-spikeri Bahar Muradova isə Azərbaycanda dindarlara diqqət yetirildiyini, məscidlərin təmir olunduğunu bildirib: “Əslində, Milli Məclisin tribunasından istifadə edib ajiotaj yaratmaq lazım deyil. Bu məsələni Milli Məclisdə müzakirəsi predmetinə çevirməyə ehtiyac yoxdur”. B. Muradova deyib ki, hansısa məsələ millət vəkillərini narahat edirsə, bununla bağlı konkret instansiyalara müraciət edilsin.

Spiker Oqtay Əsədov da məsələyə münasibət bildirib: “Bir yerdə məscid təmirə dayananda car çəkmək lazım deyil. Görürsünüz ki, dövlət məscidlərlə bağlı nə qədər iş görür. Məscidlər təmir olunur, yenidən qurulur. Bizim dörd ilimiz gedib, bir ilimiz qalıb. Çalışın ki, səviyyəli məsələlər qaldırın”.

Millət vəkili Əli Əhmədov isə çıxışında ATƏT-in Minsk Qrupunun fəaliyyətinə toxunub, bu fəaliyyətin qaneedici olmadığını deyib: “Bunu dəfələrlə ölkə prezidenti də deyib. Minsk Qrupunun Fransadan olan həmsədri Bernar Fasienin bu yaxınlarda verdiyi açıqlama vasitəçilik missiyasını yerinə yetirən şəxsin fəaliyyəti ilə bir araya sığmır. Dəfələrlə deyilib ki, Türkiyə-Ermənistan sərhədlərinin açılması münaqişənin həlindən asılıdır. O isə bunun ayrı-ayrı proses olduğunu söyləyir”.

Ə. Əhmədov deyib ki, belə olan halda vasitəçi missiyasını yerinə yetirən şəxs Azərbaycanın mövqeyinə zidd, Ermənistanın mövqeyinə uyğun açıqlama verir.

Millət vəkili Cəmil Həsənli isə bir qədər əvvəl xalq yazıçısı Sabir Əhmədlinin vəfat etdiyi xatırladaraq deyib ki, bu fakta laqeydliklə yanaşılıb: “Millətin öz yazıçısına münasibəti belə olmamalıdır”.