Daxili siyasət

Ana səhifə

Daxili siyasət

Azərbaycan prezidenti Şəmkirdə səfərdə olub

26 may 2009 08:20 (UTC +04:00)

Şəmkir - APA. Azərbaycan prezidenti İlham Əliyev Şəmkir rayonunda səfərdə olub. APA-nın məlumatına görə, dövlət başçısı əvvəlcə Heydər Əliyevin Şəmkirin mərkəzi parkındakı abidəsini ziyarət edib, önünə gül dəstəsi qoyub. Sonra Şəmkir Olimpiya İdman Kompleksinin açılışı keçirilib. Prezident açılışı bildirən lenti kəsib, komplekslə yaxından tanış olub.

Tanışlıqdan sonra dövlət başçısı orada rayon ictimaiyyətinin nümayəndələri və idmançılarla görüşüb.

Prezident Şəmkir çayı üzərində inşa ediləcək dəryaçanın təməlqoyma mərasimində də iştirak edib. Dövlət başçısına su anbarının suvarma sxemi, dəryaçanın bəndinin baş planı və iqtisadi göstəriciləri barədə məlumat verilib.

Su anbarının ümumi tutumu 160 milyon kubmetr, faydalı iş həcmi 135 milyon kubmetr, illik orta su axını 260 milyon kubmetr olacaq. Anbarın su səthinin sahəsi 504 hektara, suyun maksimal dərinliyi 122 metrə çatacaq. Hidrotexniki qurğunun üstdən uzunluğu 692 metr, eni 12 metr təşkil edəcək. Təkcə bənd və bənd qovşağında 21 milyon kubmetrdən çox torpaq işi, 85 min kubmetr beton və daş-beton işləri görüləcək, tikintidə 7 min tondan çox metal konstruksiya və armaturdan istifadə olunacaq.
Altı aqreqatın quraşdırılacağı su elektrik stansiyasının illik enerji hasilatı 56 milyon kv/saat təşkil edəcək. İnşaat işlərini Türkiyə şirkəti həyata keçirəcək.

Su anbarının inşası ətraf rayonların suvarma sisteminin yenidən qurulmasına və əsaslı şəkildə inkişafına imkan yaradacaq.

Prezident Şəmkirə səfəri çərçivəsində “Şərq ulduzu” Məhdud Məsuliyyətli Cəmiyyətində də olub. Dövlət başçısına məlumat verilib ki, müəssisənin Şəmkir rayonunda 108 hektar üzüm sahəsi var. Üzüm bağları Fransa, İran və Gürcüstandan gətirilən və yerli tinglər hesabına salınıb. Artıq müəssisənin təsərrüfatında süfrə üzümünün yetişdirilməsinə də başlanıb, burada Ordubad və Urmiyadan gətirilən kişmişi üzüm tingləri əkilib.

Bildirilib ki, 2006-cı ildə yaradılan müəssisə hazırda 2 min ton üzümü emal etmək gücünə malikdir. Hazırda zavodda 7 növ şərab istehsal edilir. “Şardane”, “Bayan şirə”, “Merlot”, “Rikasiteli”, “Sapiravi”, “Kaberne savinyon” və “Şiraz” şərabları onların əldə olunduqları üzüm sortlarının adını daşıyır.

Müəssisədə 125 nəfər çalışır, orta aylıq əmək haqqı 250-300 manatdır.

Prezident İ. Əliyev müəssisədə yeni istehsal xəttini işə salıb.

Səfəri zamanı Şəmkir Mədəniyyət Evinin qarşısında istifadəyə verilmiş istirahət parkı ilə də tanış olan dövlət başçısı parkı gəzib, dahi Azərbaycan bəstəkarı Üzeyir Hacıbəylinin və şair Əhməd Cavadın əks olunduğu kompozisiyaya və aşıq Teymurun xatirəsinə yaradılmış guşəyə baxıb.

Dövlət başçısı Mədəniyyət Evində təşkil olunmuş sərgi ilə də tanış olub.

Əliyev_Gəncə