Daxili siyasət

Ana səhifə

Daxili siyasət

Rəsul Quliyev: “ACP sədrliyinə öz namizədim olmayacaq”

24 iyun 2009 17:18 (UTC +04:00)

Bakı. Elnur Məmmədli – APA. “Mən Akif Şahbazovun partiyanın sədrliyindən istefası ilə bağlı izahı ilə tanış olmuşam. Amma fikirləşirəm ki, o gərək istefa verməyəydi”. Bunu APA-ya açıqlamasında Açıq Cəmiyyət Partiyasının lideri Rəsul Quliyev partiyanın sədri Akif Şahbazovun öz vəzifəsindən istefa verməsinə münasibət bildirərkən deyib.

A. Şahbazovun partiya sədrliyindən istefa verməsinə baxmayaraq, R. Quliyev keçmiş sədrin ona həmişə yaxın bir şəxs kimi qalacağını qeyd edib. ACP lideri A. Şahbazovun hələ bir müddət əvvəl sədrlikdən istefa vermək fikrində olduğunu vurğulayıb: “Akif müəllim çoxdan belə bir fikrə düşmüşdü. 6-7 ay bundan əvvəl bir neçə dəfə deyib ki, partiya sədrliyindən istefa vermək istəyir. Amma mən deyirdim ki, bəlkə bir qədər gözləyəsən, amma görünür ki, daha gözləmək istəməyib. Ona görə də bu mənim üçün elə bir yenilik olmadı, çünki bir neçə dəfə mənə bildirmişdi”.

R. Quliyev partiyanın rəhbərliyinin yenidən formalaşmasına qarışmayacağını da qeyd edib: “Hazırda partiyada rəhbərlikdə olanlar hamısı cavanlardır. O cavanlar müəyyən bir müddətdən sonra yəqin ki, hansısa bir təkliflə çıxış edəcəklər ki, gələcəkdə hansı işləri görmək istəyirlər. Və bu təkliflərə də mən böyük məmnuniyyətlə baxacağam. Yalnız ondan sonra fikrimi söyləyə bilərəm. Sədrliyə isə öz namizədim olmayacaq. Mən həmişə çalışmışam ki, sədr seçmək məsələsinə qarışmayam. Çünki Azərbaycanda belə mentalitet formalaşıb ki, başda duran şəxs nəsə desə, kimsə onu dəyişmək istəmir. Bu ürəyincə olmasa belə onu qəbul edir, deyiləni edir. Mən də belə bir qərara gəlmişəm ki, sədrlə bağlı təşəbbüslə çıxış etməyəcəyəm”.

Müşaviri Zəminə Dünyamalıyeva son vaxtlar ACP-nin fəaliyyətinin dayandırılması təkliflərinə gəldikdə R. Quliyev bildirib ki, o, Z. Dünyamalıyevaya belə bir tapşırıq verməyib: “Əgər söhbət ondan gedirsə ki, o, həm mənə yaxındır, həm müşavirdir, bu barədə heç bir tapşırığım olmayıb. Zəminə xanım öz fikirlərini söyləyir. Ona görə də onun bu fikrinə izahat verə bilmərəm. O partiyanın üzvüdür və belə bir ideya səsləndirib. Bu ideya o vaxt həyata keçmiş sayıla bilər ki, partiyanın yerdə qalan üzvləri də bu təklifi dəstəkləsinlər. Əgər dəstəkləməyiblərsə, bu sadəcə bir bəyanatdır”.