Daxili siyasət

Daxili siyasət

Milli Məclisdə “2010-cu ilin dövlət büdcəsi haqqında” qanun layihəsinin müzakirəsi davam etdirilib

11 noyabr 2009 16:24 (UTC +04:00)

Bakı Elbrus Seyfullayev – APA. Milli Məclisin bugünkü iclasında “2010-cu ilin dövlət büdcəsi haqqında” qanun layihəsinin müzakirəsi davam etdirilib. APA-nın məlumatına görə, iclasda millət vəkili Eldar İbrahimov çıxış edərək “Azərittifaq”a güzəştli kreditlərin ayrılmasını təklif edib. Millət vəkili deyib ki, sözügedən quruma güzəştli kreditlər ayrılarsa, onlar bölgələrdə kənd təsərrüfatı məhsullarının satışını təşkil edə bilərlər.

Deputat Pənah Hüseyn Dövlət Neft Fondunun konsepsiyasının öz əhəmiyyətini itirdiyini bildirib, buna görə də sözügedən qurumun ləğv olunması təklifi ilə çıxış edib. Onun sözlərinə görə, Maliyyə və Vergiləri Nazirliyi, o cümlədən Dövlət Gömrük Komitəsi vahid qurumda birləşdirilməlidir.

Deputat Yaqub Mahmudov elm sahəsinə ayrılan vəsaitin artırılmasını təklif edib. Onun sözlərinə görə, elm adamlarının əmək haqqı da qaldırılmalıdır.

Deputat Qənirə Paşayeva ürək qüsuru olan uşaqların əməliyyatına kömək göstərilməsi təklifini irəli sürüb: “Ümumiyyətlə, tibb sahəsinə diqqətlə yanaşılmalıdır. Tibbi təhsilə xüsusi qayğı göstərilməlidir”. Q. Paşayeva, həmçinin tarixi və mədəni abidələrin təmir-bərpasına diqqət göstərilməsini zəruri sayıb. O, deputat seçildiyi Tovuz rayonunda insanların su qıtlığından əziyyət çəkdiyini də diqqətə çatdırıb.

Deputat Əli Məsimli büdcəyə əlavə vəsaitlərin cəlb olunması üçün çıxış yolunu islahatların aparılmasında gördüyünü deyib.

Millət vəkili Nəsib Nəsibli isə büdcə gəlirlərinin əsas hissəsinin Dövlət Neft Fondundan formalaşmasını mənfi hal kimi dəyərləndirib.

Spiker Oqtay Əsədov müzakirələrin sonunda sabahkı iclas günündə “2010-cu ilin dövlət büdcəsi haqqında” qanun layihəsinin qəbul olunmasına nail olacaqlarına ümid etdiyini deyib: “Hesab edirəm ki, sabah günün birinci yarısında müzakirələri davam etdirib, ikinci yarısında sənədi qəbul edə bilərik. Daha sonra isə biz büdcə zərfinə daxil olan digər məsələlərin müzakirəsi ilə məşğul olacağıq”.