Daxili siyasət

Daxili siyasət

Deputat: “Gələn ilin büdcəsində KİV-in İnkişafına Dövlət Dəstəyi Fonduna ayrılan vəsait yetərli deyil”

12 noyabr 2009 12:55 (UTC +04:00)

Bakı. Elbrus Seyfullayev - APA. Bu gün Milli Məclisin (MM) iclasında “Azərbaycan Respublikasının Dövlət büdcəsi haqqında” qanun layihəsinin müzakirələri davam etdirilib. APA-nın xəbərinə görə, müzakirələrdə çıxış edən millət vəkilləri bir sıra təkliflərlə çıxış ediblər.

Deputat Səməd Seyidov büdcə layihəsində 70-ə yaxın səfirlik və konsulluğun maliyyələşdirilməsinin əksini tapdığını deyib, ötən il bu sahəyə ayrılan vəsaitin 45, bu il 51 milyon manat göstərildiyini deyib: “Bu yaxşı haldır. Göründüyü kimi, büdcədə bütün sahələr üzrə azalma baş verməyib”.

Millət vəkili Şəmsəddin Hacıyev bildirib ki, ölkədə son illər aparılan uğurlu siyasət Azərbaycan iqtisadiyyatının təhlükəsizliyini təmin edib.

Deputat Baba Tağıyev İctimai Televiziya və Radio Yayımları Şirkətinə və hərbi büdcəyə ayrılan vəsaitin artırılmasını təklif edib: “Ermənistanda hərbi bazalar var. Gümrüdə xüsusi hərbi texnikalar yerləşdirilib. O baxımdan Azərbaycan öz hərbi xərclərini daha da artırmalıdır”.

Millət vəkili Əkrəm Abdullayev ölkədə gənclərə qayğı və diqqətin gücləndirilməsini, büdcədə bu sahəyə ayrılan vəsaitin artırılmasını istəyib.

Deputat Bəxtiyar Sadıqov mətbuata dövlət qayğısından danışaraq deyib ki, layihədə Kütləvi İnformasiya Vasitələrinin İnkişafına Dövlət Dəstəyi Fonduna ayrılan vəsait yetərli deyil. Bu rəqəmin ötən ildəki kimi saxlandığını bildirən millət vəkili vəsaitin artırılmasını təklif edib: “Qarşıdan mətbuatın 135 illiyi gəlir. Bu baxımdan büdcə artırılsa, mətbuata kreditlərin verilməsi reallaşa bilər”.

Millət vəkili Hikmət Atayev ölkədə fındıqçılığın inkişafı üçün proqram hazırlanmasını təklif edib. Deputat deyib ki, əks halda fındıqçılıq məhv olmaq təhlükəsi ilə üzləşə bilər. H. Atayev ölkədə səhiyyə sahəsində müasir texniki avadanlıqlar alındığını, amma həkimlərin bu avadanlıqlarla işləyə bilmədiyini deyib. Onun fikrincə mütəxəssislər bununla bağlı xaricə göndərilməli, ölkədə kurslar təşkil olunmalıdır.

Deputat Əli Hüseynov isə çıxışında deyib ki, büdcədə artım və azalmaların olmasını normal qəbul etmək lazımdır. Ə. Hüseynov, həmçinin ölkədə ali təhsil sahəsində attestasiyalar keçirilməsini təklif edib. Millət vəkili qeyd edib ki, ölkədə mövcud vəsaitlərin israfçılıqla xərclənməsi doğru deyil.

Müzakirələr davam edir.

Günün ikinci yarısında “Azərbaycan Respublikasının dövlət büdcəsi haqqında” qanun layihəsinin qəbul olunması gözlənilir.