Daxili siyasət

Daxili siyasət

Deputat Azərbaycanda uşaqlarla bağlı qanunvericiliyə dəyişiklik olunmasını təklif edib

20 noyabr 2009 13:00 (UTC +04:00)

Bakı. Elbrus Seyfullayev - APA. Milli Məclisin uşaq hüquqları ilə bağlı keçirilən xüsusi iclası başa çatıb. APA-nın xəbərinə görə, iclasda çıxış edən millət vəkilləri bir sıra təkliflər irəli sürüblər. Millət vəkili Əli Hüseynov MDB məkanında uşaqların həbs olunması ilə bağlı ən yaxşı göstəricinin Azərbaycanda olduğunu deyib. Onun sözlərinə görə, bu gün ölkədə həbsdə 49 yetkinlik yaşına çatmayan şəxs var. Deputat həbsdə olan uşaqlar üçün yaxın vaxtlarda müasir cəzaçəkmə müəssisənin inşa olunacağını da bildirib.

Millət vəkili Gülər Əhmədova uşaq ölümünün azaldılmasının vacib olduğunu deyib. O, UNİCEF bu sahədə layihələr həyata keçirməsini məqsədəuyğun sayıb. G. Əhmədova UNİCEF-in uşaqların hüquqlarını qorumaqdan daha çox yoxlama-statistika işi ilə məşğul olduğunu da deyib.

Deputat Qənirə Paşayeva Heydər Əliyev Fondunun prezidenti Mehriban Əliyevanın uşaqlara xüsusi qayğı göstərdiyini diqqətə çatdırıb. Onun sözlərinə görə, Fond indiyədək 300 məktəb tikərək istifadəyə verib: “Ölkədə valideyn himayəsindən məhrum olan uşaqların sayı 20 minə çatır. Bu gün Fond tərəfindən 31 uşaq evi və internat məktəbində yenidənqurma işləri aparılıb. Bundan başqa, görmə və eşitmə qabiliyyəti zəif olan, diabetdən və talassemiyadan əziyyət çəkən uşaqlar üçün Heydər Əliyev Fondu tərəfindən xüsusi layihələr həyata keçirilir. Bu gün burada iştirak edən beynəlxalq təşkilatların nümayəndələri Azərbaycanın qaçqın və məcburi köçkün uşaqlarının hüquqlarının pozulduğunu diqqətdən yayındırmamalıdırlar. Bu gün Ermənistanın təcavüzkar siyasəti nəticəsində qaçqın və məcburi köçkün həyatı yaşayan 100 minlərlə uşaqların hüquqlarının pozulmasının qarşısı alınmalıdır” .

Millət vəkili Azay Quliyev rəhbərlik etdiyi Azərbaycan Respublikası Prezidenti yanında Qeyri-Hökumət Təşkilatlarına Dövlət Dəstəyi Şurası tərəfindən təkcə 2009-cu ildə uşaqlarla bağlı 42 layihəni maliyyələşdirdiklərini deyib.

Deputat Məlahət İbrahimqızı uşaqlarla bağlı qanunvericilikdə dəyişiklik olunmasını təklif edib. Onun sözlərinə görə, “Uşaq hüquqları haqqında” qanunda hələ də sovet kriteriyaları mövcuddur: “Bu gün uşaq ölümünün qarşısının alınması Azərbaycan dövlətinin əsas diqqət göstərdiyi məsələlərdən biridir. Nəyə görə bizim qanunvericilikdə 1 kiloqram çəki ilə doğulan uşaqlar uşaq sayılmır? Hazırda uşaq hesab olunma 28 həftədən hesablanır. Bu rəqəm 22 həftəyə qədər endirilməlidir. Çəkisi 500 qramdan artıq uşaqlar vətəndaş hesab olunmalıdır. Artıq bütün dünyada bu standartlarla işləyir”.