Daxili siyasət

Daxili siyasət

Azərbaycan prezidenti Goranboyda bir neçə obyektin açılışında iştirak edib

20 noyabr 2009 14:37 (UTC +04:00)

Bakı - APA. Goranboyda səfərdə olan Azərbaycan prezidenti İlham Əliyev Veyisli kəndi yaxınlığında məcburi köçkünlər üçün salınmış yeni qəsəbənin açılışında iştirak edib. APA-nın xəbərinə görə, bildirilib ki, indiyədək ölkədə qaçqın və məcburi köçkünlər üçün 18 min 716 evdən ibarət 63 qəsəbə salının, bu qəsəbələrə 82 min qaçqın və məcburi köçkün köçürülüb. Beləliklə, çadır düşərgələri ləğv edilib.

Dövlət başçısına məlumat verilib ki, yeni qəsəbədə Kəlbəcər rayonundan olan 596 məcburi köçkün ailəsi yerləşdiriləcək. Prezident qəsəbədə tikilmiş evlərə baxıb.

O, qəsəbədə inşa olunan 360 yerlik orta ümumtəhsil məktəbinin açılışında da iştirak edib. Prezident məktəblə tanışlıqdan sonra Kəlbəcər ictimaiyyətinin nümayəndələri ilə görüşüb.

Dövlət başçısı səfəri çərçivəsində “Lalə-Tekstil” Məhdud Məsuliyyətli Cəmiyyətinin (MMC) Goranboy filialının fəaliyyəti ilə də tanış olub. Məlumat verilib ki, bu istehsal sahəsi Yevlax “Lalə-Tekstil” MMC-nin filialıdır. Burada əsasən yataq dəstləri istehsal olunur.
Filialda 200 nəfər işlə təmin olunub. Tikişçilərin orta aylıq əmək haqqı 300 manatdır. O da bildirilib ki, gələcəkdə MMC-nin yeni istehsal sahəsi işə düşəcək, bunun sayəsində 5 mindən çox yeni iş yeri açılacaq.

Bundan başqa, prezident “Goranboy” hotelinin açılışında iştirak edib.

“Gilan and Knauf Gipso-karton” Məhdud Məsuliyyətli Cəmiyyətinin fəaliyyəti ilə də tanış olan dövlət başçısına məlumat verilib ki, burada ilk məhsul 2008-ci ildə istehsal edilib. Müəssisənin fəaliyyətə başlaması 900-dən çox adamın işlə təmin olunmasına şərait yaradıb. Müəssisədə məhsul karton istehsalı sahəsində dünya üzrə lider olan “Knauf” şirkətinin texnologiyalarından istifadə olunmaqla istehsal edilir.

Daha sonra prezident müəssisənin ərazisində yeni kalsid zavodunun açılışında iştirak edib. Dövlət başçısı zavodu işə salan düyməni basıb, istehsal olunan məhsullarla tanış olub.