Daxili siyasət

Daxili siyasət

Bakıda Azərbaycan və Rusiya prezident administrasiyaları rəhbərlərinin iştirakı ilə “Russkaya kniqa” Evi açılıb

23 noyabr 2009 10:39 (UTC +04:00)

Bakı. Laçın Sultanova - APA. Bakıda Rusiya Prezident Administrasiyasının rəhbəri Sergey Narışkin və Azərbaycan Prezident Administrasiyasının rəhbəri Ramiz Mehdiyevin iştirakı ilə “Russkaya kniqa” Evinin açılış mərasimi keçirilib. APA-nın məlumatına görə, S. Narışkin deyib ki, Rusiya ilə Azərbaycan arasında münasibətlər strateji əməkdaşlıq səviyyəsinə çatıb, bu isə humanitar sahədə əməkdaşlığı inkişaf etdirməyə imkan verir. O bildirib ki, “Russkaya kniqa” Azərbaycan rəhbərliyinin dəstəyi, vətəndaş cəmiyyətin səyləri ilə açılıb. S. Narışkin Azərbaycanda rus dili və mədəniyyətinə hörmətlə yanaşıldığını, rus dilində tədris aparıldığını və rusdilli KİV-in mövcud olduğunu xüsusi qeyd edib. Ötən il Moskva Dövlət Universitetinin Bakı filialının açılmasını xatırladan S. Narışkin, Azərbaycanda 140 min nəfərin rus dilində təhsil aldığını, rus dilində 50 qəzet və jurnalın nəşr olunduğunu, 7 informasiya agentliyinin fəaliyyət göstərdiyini söyləyib.

R. Mehdiyev də Azərbaycan-Rusiya münasibətlərinin ən yüksək səviyyədə olduğunu və iki ölkənin maraqlarına cavab verdiyini vurğulayıb. Onun sözlərinə görə, bu əməkdaşlıq regionda təhlükəsizlik və stabilliyi təmin edir: “Ölkələrimiz arasında intensiv siyasi əlaqələr var. Biz siyasi dialoqa xüsusi diqqət yetiririk. Siyasi münasibətlərin möhkəm bazası və iqtisadi əməkdaşlığın səviyyəsi xalqlarımız arasında yeni əlaqələrin qurulmasına - o cümlədən humanitar sahədə - kömək edir. “Russkaya kniqa” Evinin açılması xalqlarımız arasında humanitar əlaqələrin möhkəmlənməsinə xidmət edəcək, rus ədəbiyyatını öyrənməyə imkan yaradacaq. Belə evlər Gəncə və Sumqayıtda da açılacaq, ola bilsin Bakıda ikincisi də açılsın. Azərbaycan-Rusiya münasibətləri 200 ildir uğurla inkişaf edir, Heydər Əliyev bu münasibətlərə tamamilə yeni keyfiyyət və intensiv səviyyə verib. 2001-ci ildə Vladimir Putinin Azərbaycana səfəri bu istiqamətdə vacib addım olub, bu səfər ikitərəfli münasibətlərdə yeni dövr açıb. Bu ənənələri hazırda prezidentlər İlham Əliyev və Dmitri Medvedyev uğurla davam etdirir”.

Azərbaycanda rus dilinə qayğıdan danışan R. Mehdiyev deyib ki, ölkədə 21 orta məktəbdə təhsil yalnız rus dilində, 335 məktəbdə isə həm Azərbaycan, həm də rus dillərində aparılır. MDB məkanında yeganə Slavyan Universiteti Bakıda fəaliyyət göstərir və bu ali məktəbdə rus dili və ədəbiyyatı müəllimləri hazırlanır. Azərbaycanda 160 min rusun yaşadığı söyləyən R. Mehdiyev bəyan edib ki, bu, regionda ən böyük rus diasporasıdır: “Ruslar Azərbaycan vətəndaşı kimi bütün hüquqlardan istifadə edirlər. Azərbaycanda bütün milli azlıqlar azad yaşayır və ölkənin ictimai-siyasi həyatında aktiv iştirak edir. “Russkaya kniqa” Evinin açılması dinamik və yüksələn xətlə inkişaf edən ikitərəfli münasibətlər üçün vacib hadisədir və ölkələrimizin maraqlarına cavab verir”.

azərbaycan_rusiya