Daxili siyasət

Daxili siyasət

Mübariz Qurbanlı işğal altındakı ərazilər haqqında qanun qəbul olunmasını təklif edib

26 noyabr 2009 11:10 (UTC +04:00)

Bakı. Elbrus Seyfullayev – APA. Milli Məclisdə cari məsələlərin müzakirəsində deputatlar müxtəlif məsələlərə münasibət bildiriblər. APA-nın xəbərinə görə, Pənah Hüseyn Qarabağa gedən yolların, eləcə də seçildiyi Sabirabad rayonu ərazisindəki yolların bərbad vəziyyətdə olduğunu deyib: “O yollarla heç eşşək arabası ilə də getmək olmaz”.

Fazil Mustafa məscidlərin sökülməsinə son qoyulmasını istəyib və Dağlıq Qarabağla bağlı danışıqlar prosesinə siyasi partiyaların da cəlb edilməsinin zəruriliyini vurğulayıb.

Zahid Oruc bildirib ki, Dağlıq Qarabağ münaqişəsinə dair vahid mövqe ortaya qoyulmalı, hər kəs prezidentin ətrafında birləşməli və onun qərarlarını dəstəkləməlidir.

Qüdrət Həsənquliyev mətbuatda Azərbaycan-Rusiya yaxınlaşmasının tənqid olunması ilə razılaşmayıb: “Azərbaycan yalvarsa da, onu NATO-ya qəbul etməyəcəklər. Amma biz Rusiya ilə razılaşma əldə edə, Kollektiv Təhlükəsizlik Müqaviləsi Təşkilatına üz ola və ərazimizdə Rusiya hərbi bazaları yerləşdirə bilərik. Beynəlxalq təşkilatlar, dövlətlər Azərbaycan torpaqlarının işğal olunduğunu bildirir, lakin Ermənistanı işğalçı dövlət kimi tanımırlar. Üstəlik, Amerika Dağlıq Qarabağ separatçılarına yardım edir və Azərbaycana qarşı 907-ci düzəliş hələ də ləğv olunmayıb”.

Mübariz Qurbanlı isə bəyan edib ki, heç kim Dağlıq Qarabağ məsələsindən siyasi divident götürmək üçün istifadə etməməlidir. O, Azərbaycanın 17 min kvadrat kilometrlik ərazisinin işğal altında olduğu xatırladaraq işğal olunmuş ərazilər haqqında xüsusi qanun qəbul edilməsi, beynəlxalq şirkətlərin bu ərazilərdə fəaliyyətinə qadağa qoyulması təklifini irəli sürüb.

İqbal Ağazadə bələdiyyə üzvlüyünə namizəd olan müxalifətçilərin təzyiqlərə məruz qaldığını və bunun yolverilməz olduğunu söyləyib: “Burada Rusiyanı Azərbaycana dəvət edənlər oldu. Biz istəyirik ki, onlar Azərbaycanda yeni-yeni faciələr törətsinlər? MDB məkanındakı münaqişələri Rusiya yaradıb. Xarici işlər naziri danışıqlar barədə Milli Məclisdə hesabat verməlidir”.

Sabir Rüstəmxanlı isə Qarabağ danışıqları ilə bağlı Türkiyə mətbuatı və ictimaiyyətinin Azərbaycan mətbuatı və ictimaiyyətindən daha məlumatlı olduğuna diqqət çəkib: “Niyə türkiyəli millət vəkilləri danışıqlar haqqında bizdən daha məlumatlı olmalıdır?”

İclas gündəlikdəki məsələlərin müzakirəsi ilə davam etdirilib.