Daxili siyasət

Ana səhifə

Daxili siyasət

Millət vəkilinin Azərbaycanın Kollektiv Təhlükəsizlik Müqaviləsi Təşkilatına qoşulması təklifi birmənalı qarşılanmır - SORĞU

Millət vəkilinin Azərbaycanın Kollektiv Təhlükəsizlik Müqaviləsi Təşkilatına qoşulması təklifi birmənalı qarşılanmır - <font color=red>SORĞU</font>

02 dekabr 2009 15:10 (UTC +04:00)

Bakı. Elnur Məmmədli - APA. “Azərbaycan Kollektiv Təhlükəsizlik Müqaviləsi Təşkilatına qoşulsa belə, bu, Dağlıq Qarabağ probleminin həllində dəyişiklik yaratmayacaq”. Bunu APA-ya açıqlamasında Yeni Azərbaycan Partiyasının (YAP) icra katibinin müavini, millət vəkili Mübariz Qurbanlı deyib.

Bütöv Azərbaycan Xalq Cəbhəsi Partiyasının (BAXCP) sədri Qüdrət Həsənquliyevin Azərbaycanın Kollektiv Təhlükəsizlik Müqaviləsi Təşkilatına (KTMT) qoşulması ilə bağlı təklifinə münasibət bildirən M. Qurbanlı deyib ki, Azərbaycan bloklara qoşulmamaq xəttini götürüb: “Biz o təşkilatlara daxil oluruq ki, orada tam, bərabərhüquqlu üzv oluruq. Amma hərbi siyasi nöqteyi-nəzərdən Azərbaycan hansısa hərbi-siyasi bloka daxil olmamaq xəttinin tərəfdarıdır. Mən düşünürəm ki, Qüdrət Həsənquliyev bu çıxışı ilə qərb ictimai rəyinə müəyyən mənada Azərbaycanın zor qarşısında qaldığını, məcburi addım ata biləcək ehtimalını çatdırmağa cəhd göstərib”.

Millət vəkilinin sözlərinə görə, Azərbaycanın xarici siyasət xəttində hər hansı dəyişiklik etməsi Dağlıq Qarabağ münaqişəsinin nizamlanmasına təsir etməyəcək: “Ermənistan bizə təcavüz edib və təcavüzkar dövlətlə birlikdə hansısa hərbi-siyasi bloka daxil olmaq bir qədər anormal görünməlidir”.

Azərbaycan Sosial Demokrat Partiyasının həmsədri Araz Əlizadə isə bildirir ki, Rusiya heç bir halda Qarabağ torpaqlarının Azərbaycana qaytarılması ilə bağlı birmənalı öhdəlik götürməyəcək: “Azərbaycan KTMT-yə qoşulsa da, Rusiya Dağlıq Qarabağ münaqişəsinin həlli ilə bağlı öz üzərinə öhdəlik götürməyəcək. Çünki Rusiya ATƏT-in Minsk qrupunun həmsədrlərindən biridir, onlar indiyə kimi tutduqları xətti davam etdirəcəklər. Ona görə də belə bir öhdəlik olsa, KTMT-yə qoşulmadan da prezidentlər arasında danışıqlarla da anlaşma əldə etmək olar. KTMT-yə qoşulmağın bizə nə istisi, nə də soyuğu var. Amma bu təşkilata qoşulmaq Qarabağ probleminin həllinə kömək etməyəcək”.

Azərbaycan Demokrat Partiyasının sədri Sərdar Cəlaloğlu isə bildirib ki, Q. Həsənquliyevin səsləndirdiyi təklifin heç bir arqumentini qəbul edə bilmir. Qarabağın vaxtilə rus qoşunları tərəfindən Azərbaycandan qoparılıb ermənilərə verilməsindən hamının xəbərdar olduğunu deyən S. Cəlaloğlu hazırda da Ermənistan ərazisində Rusiya hərbi bazalarının olduğunu bildirir: “Bütövlükdə ruslar bütün dövrlərdə erməniləri dəstəkləyiblər. Bu gün guya qərbin bu məsələdə ikili mövqe tutduğunu əsas gətirib Azərbaycanın KTMT-yə qoşulmasını təklif etmək qərbin açıq olan dəstəyindən də bizi məhrum etməkdir. Bu zaman biz erməni-rus cütlüyü qarşısında tərksilah olarıq. Bu Azərbaycanın Avropaya inteqrasiyası istiqamətində bu vaxta qədər atdığı cəhdlərin üstündən xətt çəkmək deməkdir”.

Politoloq Mübariz Əhmədoğlunun sözlərinə görə, Azərbaycanın KTMT-yə qoşulması, Azərbaycanda Rusiyanın hərbi bazanın yerləşdirilməsi Konstitusiyaya ziddir: “Rusiya qoşunlarının Azərbaycana gəlməməsi üçün münaqişənin həlli bu qədər yubanıb. Gürcüstanda Rusiya qoşunları əvvəldən olub və indi vəziyyətin necə olması bəllidir. Harada rus qoşunları var, orada münaqişələrin tənzimlənməsi ilə bağlı iş yaxşı getmir”.

İndi Rusiyanın Azərbaycanda hərbi bazanın yerləşdirilməsini istəmədiyini deyən M. Əhmədoğlu “bu fikrin ciddi siyasi və informativ dəstəyi olmayacağını düşünürəm” deyib.