Daxili siyasət

Daxili siyasət

Fazil Mustafa: “Böyük Quruluş Partiyasının bələdiyyələrə 350-dən çox namizədi qeydə alınmayıb”

03 dekabr 2009 19:09 (UTC +04:00)

Bakı. Elnur Məmmədli - APA. Böyük Quruluş Partiyası (BQP) dekabrın 23-də Azərbaycanda keçiriləcək bələdiyyə seçkiləri ilə bağlı təbliğat-təşviqat kampaniyasına başlayıb.

Partiyanın başqanı Fazil Mustafa APA-ya açıqlamasında bildirib ki, bələdiyyələrlə bağlı partiyanın seçki platforması hazırlanıb. O, hər bir namizədin də seçki platformasının hazırlandığını qeyd edib. BQP-nin 385 namizədinin qeydə alındığını bildirən F.Mustafa namizədlərin sayına görə Yeni Azərbaycan Partiyasından sonra ikinci yeri tutduqlarını vurğulayıb: “Faktiki olaraq YAP-dan sonra ən çox namizəd verən təşkilat BQP oldu. Müxalifət partiyası kimi bütün imkanlarımızı səfərbər edərək, bu seçkilərə xüsusi əhəmiyyət verdik. Hazırda 340 bələdiyyədən namizədimiz var”.

F.Mustafa partiyanın 350-dən çox namizədinin qeydə alınmadığını da bildirib: “Bizə problemlər yaradıldı və 350-dən çox namizədimiz qeydə alınmadı. Bəzən digər partiyaların nümayəndələri yanlış informasiyalar verirlər ki, guya onların partiyalarına ciddi təzyiqlər olub. Amma sonradan bəlli olur ki, 500, 1000 namizədinin qeydə alınmadığını iddia edən partiyaların şikayət etdikləri adam sayı 20-30 olub. Çalışmaq lazımdır ki, müxtəlif bəhanələrlə bu seçki prosesinə mane olmağa nail olmasınlar. Bizim də namizədlərimiz qeydə alınmayıb. Amma biz bunu hər dəfə xatırlatmaqla prosesə kölgə salmaq fikrində deyilik. Bəzi partiyalar yanlış yolla təbliğat aparırlar. Amma bu gün Azərbaycanda hər bir partiyanın gücü ortadadır. Bəzi partiyaların bu vaxta qədər cəmiyyətdə özləri ilə bağlı yaratdığı təsəvvürlər bu seçkidə ortadan qalxdı. Seçkilər məsuliyyəti hazırlıq, yanaşma tələb edir. Biz bu prosesə məsuliyyətlə yanaşdıq, çalışdıq və ən çox namizəd irəli sürən ikinci partiya ola bildik”.