Daxili siyasət

Daxili siyasət

Əli Hüseynov: “İsen Qoldriçlə görüş konfidensial xarakter daşımayıb”

04 dekabr 2009 14:34 (UTC +04:00)

Bakı. Elbrus Seyfullayev-APA. Milli Məclisin Hüquq siyasəti və dövlət quruculuğu komitəsinin sədri Əli Hüseynov ABŞ Dövlət Departamentinin regional konfliktlər və Qafqaz ofisinin direktoru İsen Qoldriçlə parlamentin bir qrup deputatının görüşünün təfərrüatları haqqında APA-ya açıqlama verib. Ə. Hüseynov deyib ki, görüşdə onunla bərabər parlamentin komitə sədri Səməd Seyidov, Ümid Partiyasının sədri İqbal Ağazadə, Demokratik İslahatlar Partiyasının sədri Asim Mollazadə və Müsavat Partiyasından millət vəkili Nəsib Nəsibli iştirak ediblər: “Mətbuata açıqlamasında deputat Nəsib Nəsibli bu haqda ümumi məlumat verərək, görüşün daha çox konfidensial xarakter daşındığını deyib. Amma görüş bu formatda keçirilməyib. Görüş nahar süfrəsi ətrafında tanışlıq xarakteri daşıyıb”.

Əli Hüseynov qeyd edib ki, amerikalı qonaqla Dağlıq Qarabağ münaqişəsi ilə bağlı fikir mübadiləsi aparılıb: “Amma eyni zamanda müxalifəti təmsil edən deputatlar Azərbaycanda insan hüquqları və demokratiya haqqında tənqidi fikirlər söyləyiblər. Səməd Seyidovla mənim tərəfimdən bu barədə ABŞ rəsmisinə obyektiv məlumatlar verilib. Bildirdik ki, Azərbaycanda insan hüquqları və demokratiya sahəsində davamlı inkişaf mövcuddur, siyasi islahatlar ardıcıl olaraq həyata keçirilməkdədir”.

Onun sözlərinə görə, ABŞ rəsmisi ümumiyyətlə məsələlərə geniş şərh verməyib: “Bu baxımdan Nəsib Nəsiblinin amerikalı qonaqla Azərbaycanda demokratiya və insan hüquqları ilə bağlı hansısa konfidensial müzakirələrin aparıldığını söylənməsi yalnız təəccüb doğurur. Görüşdən sonra da Nəsib Nəsibli qonaqla söhbətini təklikdə davam edib. Bəlkə də, həmin zaman onların konfidensial söhbəti olub. Bu, Azərbaycan müxalifətinə xas olan xüsusiyyətdir. Amma yenə də qeyd edirəm ki, birgə keçirilən görüşdə ümumi məsələlər müzakirə olunub”.