Daxili siyasət

Ana səhifə

Daxili siyasət

BAXCP ABŞ Konqresinin Ermənistana və Dağlıq Qarabağdakı separatçı reyimə növbəti dəfə yardım göstərməsini pisləyib

14 dekabr 2009 13:17 (UTC +04:00)

Bakı. Elnur Məmmədli – APA. Bu gün Bütöv Azərbaycan Xalq Cəbhəsi Partiyası (BAXCP) İdarə Heyətinin növbəti toplantısı keçirilib. Partiyanın mətbuat xidmətindən APA-ya daxil olan məlumata görə, iclasda ölkənin ictimai-siyasi vəziyyəti, bələdiyyə seçkisi təbliğat kampaniyasının gedişi müzakirə olunub. Türkiyənin baş naziri Rəcəb Tayyib Ərdoğanın ABŞ-a səfərini, baş nazirin Türkiyə-Ermənistan münasibətlərinin normallaşmasının Dağlıq Qarabağ münaqişəsinin həlli ilə sıx bağlı olması haqda bəyanatlarını müsbət qiymətləndirən BAXCP rəhbərliyi Türkiyənin bütün təzyiqlərə sinə gərəcəyinə, Dağlıq Qarabağ problemi Azərbaycanın ərazi bütövlüyü çərçivəsində həll olunmayana qədər işğalçı Ermənistanla sərhədləri açmayacağına ümid etdiyini bildirib.

İclasda həmçinin, ABŞ Konqresinin işğalçı Ermənistana və Dağlıq Qarabağdakı separatçı reyimə növbəti dəfə yardım göstərməsinə kəskin etiraz ifadə olunub. Partiya Azərbaycanın milli maraqlarına zidd olan Azadlığa Dəstək Aktına 907-ci düzəlişin ləğv olunmadığını bildirib. Əvəzində isə Azərbaycanın 20 faiz torpaqlarını işğal etmiş Ermənistana və Dağlıq Qarabağdakı separatçı ermənilərə hər il milyonlarla dollar yardım ayrılması beynəlxalq hüquqa sayğısızlıq və ikiüzlü siyasət kimi qiymətləndirilib. Partiya ABŞ-ın vasitəçilik missiyasına sığmayan bu addımlarını qətiyyətlə pisləyib.