Daxili siyasət

Ana səhifə

Daxili siyasət

Milli-Demokratik Qüvvələr Birliyi Türkiyəni NATO-dan çıxmağa çağırıb

16 dekabr 2009 14:24 (UTC +04:00)

Bakı-APA. Milli Demokratik Qüvvələr Birliyinin (MDQB) Sədrlər Şurasının toplantısı keçirilib. BAXCP mətbuat xidmətindən APA-ya verilən məlumata görə, toplantıda Türkiyənin NATO-dan çıxması ilə bağlı təkliflər səsləndirilib və bununla bağlı bəyanat qəbul edilib. Bəyanatda bildirilir ki, Dağlıq Qarabağ münaqişəsi ətrafında cərəyan edən prosesləri daim diqqətlə izləyən MDQB Türkiyə Cümhuriyyətinin baş naziri Rəcəb Tayyib Ərdoğanın ABŞ-a səfəri zamanı Türkiyə-Ermənistan münasibətlərinin normallaşmasının Azərbaycanın ərazi bütövlüyünün bərpası ilə birbaşa asılı olduğunu vurğulamasını yüksək qiymətləndirir: “Ancaq ABŞ rəsmilərinin və hakim dairələrinin son günlər sərgilədiyi mövqelər bir daha göstərir ki, ABŞ öz mövqeyindən geri çəkilməyib və təcavüzkar Ermənistanı dəstəkləməkdə davam edir. Cənab Ərdoğanın səfərindən dərhal sonra təcavüzkar Ermənistana və Dağlıq Qarabağdakı qondarma quruma maliyyə yardımı göstərilməsi ilə bağlı ABŞ Konqresinin qərarı bunun bariz nümunəsidir”.

Bəyanatda qeyd olunur ki, Türkiyə NATO-nun üzvü olaraq həmişə öz öhdəsinə düşən vəzifələri vicdanla yerinə yetirib və yetirməkdə davam edir: “Ancaq nə ABŞ, nə də Türkiyənin NATO-dakı müttəfiqi olan Avropa ölkələri Türkiyənin PKK terrorçularına qarşı mübarizəsində nəinki ona dəstək vermir, əksinə açıq və ya gizli şəkildə PKK-ya yardım göstərirlər. Türkiyə NATO-nun üzvü olan yeganə Avropa ölkəsidir ki, Avropa Birliyinə buraxılmır. ABŞ, Avropa dövlətləri beynəlxalq hüquq normalarına zidd olaraq Azərbaycan torpaqlarını işğal etmiş Ermənistana yalnız xristian olduqları üçün hərtərəfli dəstək verir. Ancaq təcavüzün nəticələri ilə barışmaq üçün müsəlman Azərbaycana və Türkiyəyə təzyiq göstərirlər. Baş verən proseslərin təhlili bir daha göstərir ki, ABŞ və Avropa dövlətləri Türkiyədən HATO üzrə bir müttəfiq kimi yalnız öz mənafeləri naminə yararlanmağa çalışır, Türkiyənin mənafelərini isə nəzərə almaq istəmirlər”.

MDQB Türkiyənin NATO-dan çıxmasını, ABŞ-ın Türkiyədəki İncirlik hərbi bazasını ləğv etməsini, Azərbaycanla, digər türk respublikaları və ərəb-müsəlman ölkələri ilə strateji əməkdaşlığını genişləndirməsini, bu ölkələrlə birgə təhlükəsizlik təşkilatının yaradılmasını məqsədəuyğun sayıb: “Türkiyə ilə Rusiya arasında mövcud münasibətlərin strateji tərəfdaşlıq səviyyəsinə yaxınlaşdığını, eləcə də Rusiyada bir sıra türk respublikalarının mövcudluğunu, bu ölkədə 50 milyona yaxın müsəlmanın yaşadığını nəzərə alaraq MDQB Türkiyə ilə Rusiya arasında müttəfiqlik münasibətlərinin yaradılmasını vacib sayır. MDQB bəyan edir ki, qeyd edilən istiqamətlərdə fəaliyyətin həyata keçirilməsi müasir şəraitdə həm Türkiyənin, həm də Azərbaycan və bütövlükdə Türk Dünyasının mənafelərinə daha uyğun olardı".