Daxili siyasət

Ana səhifə

Daxili siyasət

Qarabağla bağlı yeni saytın təqdimatı keçirilib

18 dekabr 2009 08:47 (UTC +04:00)

Bakı. Elnur Məmmədli – APA. Azərbaycan prezidenti yanında Dövlət İdarəçilik Akademiyasının hazırladığı www.garabagh.ws saytının təqdimat mərasimi keçirilib. APA-nın məlumatına görə, tədbirdə çıxış edən Dövlət İdarəçilik Akademiyasının rektoru Seyfəddin Qəndilov bildirib ki, sayt akademiyanın UNESCO Mərkəzi ilə “Dostluq” Gənclərin Əlaqələndirmə Mərkəzinin birgə fəaliyyəti, QHT-lərə Dövlət Dəstəyi Şurasının maliyyə dəstəyi ilə hazırlanıb.

Milli Məclisin sədr müavini Bahar Muradova deyib ki, Qarabağla bağlı ədalətsizlik bu gün də davam edir və həqiqətlərin dünyaya çatdırılması üçün hər kəsin üzərinə vəzifələr düşür: “Çox vaxt rəsmi fəaliyyətdən daha çox fərdi və ictimai fəaliyyət dünya arenasında əks-səda doğura bilir. Biz dünyanın müxtəlif qurumlarının rəhbərləri ilə görüşürük, onların diqqətini problemə yönəldirik. Qarabağla bağlı xeyli saytlar yaradılıb və müəyyən işlər görülüb. Amma bu, kifayət deyil. Problem həll olunmayana qədər bu proses davam etməlidir”.

QHT-lərə Dövlət Dəstəyi Şurasının sədri Azay Quliyev Azərbaycanla Ermənistan arasındakı informasiya savaşında yeni mərhələyə qədəm qoyulduğunu söyləyib. Buna görə də o, qarşıda daha böyük vəzifələr dayandığını və saytın üzərinə böyük vəzifələr düşdüyünü bildirib: “Saytda dövlətin Qarabağla bağlı həyata keçirdiyi siyasət də öz əksini tapmalıdır”.

Çıxışlardan sonra sayt mərasim iştirakçılarına təqdim olunub.