Daxili siyasət

Daxili siyasət

Bahar Muradova: “Zərurət yaransa, Milli Məclis Dağlıq Qarabağ münaqişəsi ilə bağlı müzakirə aparıb, konkret münasibət bildirəcək”

21 dekabr 2009 10:58 (UTC +04:00)

Bakı. Elbrus Seyfullayev - APA. “Hesab edirəm ki, bələdiyyə seçkiləri demokratik qaydalara uyğun keçiriləcək. İndiyə qədər proses normal keçib, bütün namizədlərə bərabər təbliğat imkanı yaradılıb”. APA-nın xəbərinə görə, bunu jurnalistlərə açıqlamasında Milli Məclisin sədr mavini Bahar Muradova deyib.

Ermənistan parlamentarları ilə növbəti görüşün nə vaxt keçiriləcəyi barədə suala aydınlıq gətirən B. Muradova bildirib ki, onlarla görüş məqsəd deyil: “Adətən Avropa Şurası, ATƏT və digər beynəlxalq təşkilatlar çərçivəsində görüşlər olur. Bu çərçivədə növbəti sessiyaların birində biz mütləq erməni millət vəkilləri ilə fikir mübadiləsi aparmaq imkanı əldə edəcəyik”.

“Alternativ hərbi xidmət haqqında” qanunun qəbul olunmamasına toxunan parlamentin sədr müavini Azərbaycanın faktiki müharibə şəraitində olduğunu xatırladaraq vəziyyət düzələcəyi təqdirdə Avropa Şurası qarşısındakı bu öhdəliyin də yerinə yetiriləcəyini vurğulayıb. Dağlıq Qarabağ danışıqlarının gedişi ilə bağlı Milli Məclisdə müzakirələrin aparılmasının mümkünlüyünə dair sualı cavablandıran B. Muradova bunun zərurətdən asılı olacağını söyləyib: “Danışıqların gedişi haqqında məlumatlar bu və ya digər qaydada cəmiyyətə verilir. Amma bilirsiniz ki, danışıqlar konfidensial aparılır. Bu məsələyə parlamentdə baxılması zərurəti yaransa, o zaman Milli Məclis müzakirələr aparıb, konkret münasibətini bildirəcək”.

Milli Məclisdə “Energetika haqqında”, “Qaz təchizatı haqqında”, “Su təchizatı və tullantı sular haqqında” qanunların təhrif olunması məsələsinə də münasibətini açıqlayan B. Muradova hər şeyin qanun çərçivəsində edildiyini deyib: “Bununla bağlı izahat verildi. Hər şey qanuni olub. Hanısa təhrifdən söhbət gedə bilməz”.