Daxili siyasət

Ana səhifə

Daxili siyasət

Beynəlxalq Qırmızı Xaç Komitəsinin əməkdaşları erməni əsirliyində olan Azərbaycan əsgəri Samir Məmmədova növbəti dəfə baş çəkiblər

19 yanvar 2007 15:12 (UTC +04:00)

Beynəlxalq Qırmızı Xaç Komitəsinin (BQXK) Azərbaycan nümayəndəliyinin əməkdaşları sonuncu dəfə ermənilərin ötən il dekabrın 24-də əsir götürdüyü Azərbaycan Ordusunun hərbçisi Samir Nazim oğlu Məmmədovun ailəsi ilə dekabrın 16-da görüşüblər. Bu barədə APA-nın Qarabağ bürosuna əsirin ailəsindən məlumat verilib. Hərbçinin ailəsindən bildirilib ki, qurumun əməkdaşları S.Məmmədovun adından onlara 1 məktub təqdim ediblər: “Məktubda bircə cümlə yazılmışdı: “Mən yaxşıyam”. Biz məktubu Samirin yazdığına da inanmırıq, çünki xətti onun xəttinə oxşamırdı”. BQXK-nın Azərbaycan nümayəndəliyinin ictimaiyyətlə əlaqələr şöbəsinin əməkdaşı Gülnaz Quliyeva isə APA-ya bildirib ki, qurumun İrəvan nümayəndəliyinin əməkdaşları bu gün azərbaycanlı hərbçiyə növbəti dəfə baş çəkiblər: “Biz hərbçinin ailəsinin yazdığı məktubu İrəvana göndərmişik. Yaxınlarda məktub hərbçiyə veriləcək”. G.Quliyeva deyib ki, əsirin ailəsinin hər hansı şübhəsi varsa, BQXK-ya müraciət edə bilər.
Qeyd edək ki, Qazaxdakı “N” saylı hərbi hissədə xidmət edən kiçik çavuş S.Məmmədov hərbi xidmətə 1 il əvvəl Bərdə Hərbi Komissarlığından çağırılıb. S.Məmmədov dekabrın 24-də xidmət etdiyi hərbi hissədən 15 km aralıda, neytral zonada Qazax-İcevan sərhədində əsir götürülüb. Azərbaycanlı hərbçinin üzərində silah-sursat olmayıb. /APA/