Daxili siyasət

Daxili siyasət

“Azadlıq” bloku seçki komissiyalarının hakimiyyətlə 4 müxalifət partiyası arasında paritet əsaslarla formalaşmasını təklif edir

14 mart 2007 12:07 (UTC +04:00)

“Azadlıq” bloku seçki komissiyalarının hakimiyyətlə AXCP, Müsavat, ADP və ALP arasında paritet əsaslarla formalaşmasını təklif edir. Bu barədə APA-ya blokun Sədrlər Şurasının keçmiş üzvü, ADP-nin bir hissəsinə rəhbərlik edən Sərdar Cəlaloğlu məlumat verib. O, blokun təklifi ilə əlaqədar Müsavat Partiyasının başqanı İsa Qəmbərlə görüşərək müzakirələr apardığını bildirib: “Sonuncu parlament seçkilərində YAP-dan sonra ən çox səs torlamış qurumlar məhz bunlardır. Ona görə də komissiyaların tərkibinin siyasi qüvvələrin topladığı səslərə uyğun formalaşdırılmasına tərəfdarıq”. S. Cəlaloğlunun sözlərinə görə, müzakirələr davam edəcək və bu məsələ həm hakimiyyətin, həm də beynəlxalq təşkilatların qarşısında qaldırılacaq: “ADP-nin “Azadlıq” blokundan çıxmasından sonra yeni situasiya yaranıb və müxalifətdə iki tərəf əmələ gəlib ADP, Müsavat və digər qurumlar. Yəqin ki, situasiyaya tam aydınlıq gələndən sonra bu istiqamətdə səylərimiz davam edəcək”.
AXCP sədrinin müavini Həsən Kərimov da “Azadlıq” blokunun və Müsavat Partiyasının ən güclü müxalif qurumlar olduğunu, bu səbəblə seçki komissiyalarının 4 partiya arasında bölünməsi təklifinin ortaya çıxdığını qeyd edib: “Ola bilsin ki, hakimiyyət Böyük Quruluş, Ümid, Milli İstiqlal partiyalarını da müxalifət kimi təqdim edəcək. Amma biz düşünürük ki, onlar artıq müxalifət düşərgəsindən uzaqlaşıblar”. H. Kərimov yalnız Klassik Xalq Cəbhəsi Partiyasının (KXCP) 4 partiyanın sırasına qoşulmasını mümkün sayır.
Müsavat Partiyası Mərkəzi İcra Aparatının rəhbəri Arif Hacılı isə bildirib ki, müxalifət yalnız Müsavat Partiyası və “Azadlıq” blokundan ibarət deyil: “Başqa müxalifət partiyaları da var ki, onlar da komissiyalarda təmsil olunmalıdırlar. AMİP, AXP və KXCP “Azadlıq” blokundakı partiyalardan az təsir imkanlarına malik deyil”. A. Hacılının sözlərinə görə, seçki komissiyalarının paritet əsaslarla formalaşdırılması təklifinin müəllifi “Azadlıq” bloku deyil, təklif zaman-zaman Müsavat Partiyası və beynəlxalq qurumlar tərəfindən səsləndirilib. Müsavata təqdim olunmuş təkliflərin müzakirəsinə gəldikdə, A. Hacılı “Azadlıq” blokunda qeyri-müəyyən vəziyyət yarandığı üçün buna ehtiyac görmür.
AMİP sədri Ayaz Rüstəmov “Azadlıq” blokundakı partiyaları daim qeyri-ciddi fikirlər irəli sürməkdə ittiham edib: “Biz hesab edirik ki, seçki komissiyaları hakimiyyətin nəzarətindən çıxarılmaqla peşəkar əsaslarla formalaşdırılmalıdır”. KXCP sədri Mirmahmud Mirəlioğlu da rəhbərlik etdiyi partiyanın yeni qeydiyyatdan keçməsinə baxmayaraq, cəmiyyətdə öz yeri və rolu olduğunu vurğulayıb. O, seçki komissiyalarının iqtidar və 4 müxalifət partiyasının təmsilçilərindən ibarət formalaşdırılması təklifini irəli sürənlərin özlərinə vurğun olduqlarını bildirib və onları bu adətdən çəkinməyə çağırıb. /APA/