Daxili siyasət

Ana səhifə

Daxili siyasət

Bəhram Xəlilov: “Müsahibə keçirilmədən işə qəbul faktları korrupsiyaya şərait yaradan hal kimi qiymətləndirilməlidir”

13 iyun 2007 14:42 (UTC +04:00)

APA-nın məlumatına görə, komissiya sədri bildirib ki, bu il aprelin 28-də 15 dövlət orqanında 189 vakant dövlət qulluğu vəzifəsinə qəbul üçün keçirilən test imtahandan uğurla keçən 325 namizəd müsahibə mərhələsinə buraxılıb, söhbət zamanı uğur qazanaraq iddia etdiyi vəzifəyə uyğun hesab edilən 57 namizəd vəzifəyə təyin edilmək üçün müvafiq dövlət orqanlarının rəhbərlərinə təqdim edilib. Onlardan 30-u iddia etdiyi vəzifəyə təyin edilib, bir namizəd isə iddia etdiyi vəzifəni tutmaqdan imtina edib. Dövlət orqanlarının rəhbərlərinə təqdim edilən namizədlərdən bəziləri eyni vəzifəyə iddia etdiyi üçün 12 namizəd vəzifəyə təyin edilməyib. Bu namizədlər qanunvericiliyə uyğun olaraq ehtiyat kadrlar siyahısına daxil ediləcək.
Komissiya sədri deyib ki, boş qalan dövlət qulluğu vəzifələri üzrə yenidən müsabiqə elan ediləcək. “Bizim işimiz boş qalan dövlət qulluğu vəzifələrini doldurmaq deyil” deyən B. Xəlilov bildirib ki, əgər həmin vəzifələrə uyğun namizədlər yoxdursa, o yerlər boş qalsa, yaxşıdır. Komissiya sədri müsahibənin obyektiv aparıldığını qeyd edərək deyib ki, obyektivliyi təmin etmək üçün müsahibə aparan qruplarda təmsil olunan şəxsləri prosesə az vaxt qalmış təyin ediblər. 2007-ci il 23 aprelindən 5 iyunadək 15 dövlət orqanında 200 vakant dövlət qulluğu vəzifəsinin tutulması üçün elan edilən müsabiqə barədə danışan B. Xəlilov deyib ki, hazırda müsabiqədə iştirak üçün 910 namizəd qeydə alınıb. Bu vəzifələrin tutulması üçün müsabiqənin ilk mərhələsi olan test imtahanı iyunun 23-də keçiriləcək. Milli Məclisdə “Dövlət qulluğu haqqında” qanununa əlavələr edildiyini xatırladan komissiya sədri bildirib ki, buna uyğun olaraq rəhbəri olduğu qurum dövlət qulluqçularının qiymətləndirmə qaydalarını formalaşdıracaq: “Hər bir dövlət qulluqçusu qiymətləndirilməlidir. Bu, vəzifədə yüksəliş, fəaliyyətdə olan çatışmazlıqların aradan qaldırılması üçün nəzərdə tutulub. Qiymətləndirmə attestasiya deyil”. Komissiya sədri bəyan edib ki, nəzərdə tutulan qiymətləndirmə tam şəkildə tətbiq olunanda, o zaman attestasiyaya ehtiyac qalmayacaq. Hal-hazırda komissiyada qiymətləndirmə ilə bağlı müvafiq normativ hüquqi aktların hazırlanması üzrə işlər aparılır. B. Xəlilov bildirib ki, bütün dövlət qulluğu vəzifələrinə qəbul müsahibə yolu ilə keçirilməlidir. Onun sözlərinə görə, müsahibə keçirilmədən işə qəbul faktı varsa, bu, korrupsiyaya şərait yaradan hal kimi qiymətləndirilməlidir. /APA/