Daxili siyasət

Ana səhifə

Daxili siyasət

Qarabağ Məşvərətçi Şurasının yaradılması barədə razılıq əldə olunub

13 iyun 2007 12:34 (UTC +04:00)

Doqquz təşkilat və şəxsin təşəbbüsü ilə Qarabağ Forumu keçirilib. APA-nın məlumatına görə, forumda Dağlıq Qarabağ münaqişəsinin ilə bağlı hazırkı vəziyyət müzakirə edilib, referendum ideyasına münasibət bildirilib, Qarabağ məsələsində birgə fəaliyyət göstərilməsi üçün əlaqələndirici və məşvərətçi qurumun yaradılması haqda fikir mübadiləsi aparılıb. Qarabağ Azadlıq Təşkilatının sədri Akif Nağı Qarabağ münaqişəsi ilə bağlı siyasi təşkilatları özündə birləşdirəcək “Qarabağ Məşvərətçi Şurası” adlı qurumun yaradılmasını təklif edib.
Milli Məclisin deputatı Pənah Hüseyn forum adından parlamentə və prezidentə müraciətin ünvanlanmasını təklif edib: “Milli Məclisdən Qarabağ məsələsinin açıq müzakirəsi təşkil edilməlidir. Ölkədə hərbi vəziyyət elan edilməli, işğal altında olan ərazilərin azad edilməsi üçün hərbi əməliyyatlara hazırlıq başlamalıdır. Məncə, ölkənin bütün siyasi qurumları bu təklifi dəstəkləyər”.
Müsavat Partiyasının başqanı İsa Qəmbər isə beynəlxalq təşkilatları prinsipsizlik nümayiş etdirməkdə ittiham edib: “Qarabağ məsələsi dalana dirənib. Beynəlxalq təşkilatlar isə münaqişənin həllində əzm nümayiş etdirmirlər”.
Azərbaycan Xalq Cəbhəsi Partiyasının sədri Əli Kərimli ATƏT-in Minsk qrupu tərəfindən təklif edilən prinsiplərin Azərbaycan üçün təhqir olduğunu söyləyib. O, hökumətdən bu prinsiplərin dərhal rədd olunmasını istəyib.
Azərbaycan Milli İstiqlal Partiyasının lideri Etibar Məmmədov danışıqlar zamanı müzakirə edilən prinsiplərin açıqlanmasını zəruri hesab edib: “Danışıqlar rəsmi səviyyədə aparıldığından, ictimai-siyasi qurumların buna müdaxiləsi mümkün olmasa da, məsələ ilə bağlı öz mövqeyimizi açıqlaya bilərik”.
Bütöv Azərbaycan Xalq Cəbhəsi Partiyasının sədri Qüdrət Həsənquliyev isə bildirib ki, münaqişənin həllini öz üzərinə götürən vasitəçilərə müddət təyin olunmalı, ölkənin bütün potensialı ordu quruculuğu prosesinə yönəldilməlidir: “Bu müddət bitdikdən sonra dövlət müvafiq tədbirlər görməlidir”.
Forumun sonunda Qarabağ Məşvərətçi Şurasının yaradılması məsələsi müzakirə edilib. Tədbirdə qərara alınıb ki, forum təşkilatçılarının bu qurumu təsis etməsi barədə razılıq əldə olunub. /APA/