Daxili siyasət

Ana səhifə

Daxili siyasət

Bakıda GUAM ölkələri rəhbərlərinin növbəti sammiti çərçivəsində görüşlər və danışıqlar keçirilib

18 iyun 2007 14:34 (UTC +04:00)

Görüşlə bağlı APA-ya eksklüziv açıqlamasında Azərbaycanın rabitə və informasiya texnologiyaları naziri Əli Abbasov GUAM dövlətlərindəki həmkarları ilə birgə maraq doğuran layihələr, o cümlədən, TransAvropa-Asiya (TAE) optik magistral kanalından birgə istifadə, elektron hökumət birgə laihələrinin həyata keçirilməsi, televiziya və radio sahəsində sərhəd bölgələrdə texniki infrastrukturla bağlı məsələləri müzakirə etdiklərini deyib. Nazir müzakirə olunan məsələlər arasında iqtisadi və texnozonaların səmərəliliyinin artırılması məsələlərinin də olduğunu qeyd edib: “Biz təklif vermişik ki, bu ölkələrdə olan xüsusi iqtisadi zonaların qarşılıqlı əlaqələrini tənzimləyən, onların fəaliyyətini digər bölgələrlə müqayisədə yüngülləşdirən suallar da müzakirə olunsun. Artıq bununla bağlı razılıq əldə olunub”.
Yanacaq və energetika naziri Natiq Əliyev isə bildirib ki, GUAM-ın iqtisadi blokunun iclasında müzakirə olunan əsas məsələ Ukrayna, Polşa, Litva, Gürcüstan və Azərbaycanın Krakov sammitində razılaşdırılan Odessa-Brodı enerji layihəsinin əsaslandırılması olub. Nazirin sözlərinə görə, hər bir ölkə layihədə müəyyən şərtlərlə iştirak etmək istəyir: “Hələlik tərəflər layihədə iştirak edəcək qurumlarını müəyyənləşdirməyib. Azərbaycandan yəqin ki, Dövlət Neft Şirkəti iştirak edəcək”. N.Əliyev qeyd edib ki, sentyabrda Litvanın paytaxtı Vilnüsdə enerji sammiti keçiriləcək: “Sammitdə işçi qrupları yenidən Odessa-Brodı layihəsini nəzərdən keçirəcək. Bu ölkələri hələlik Azərbaycanın yalnız nefti maraqlandırır. Gələcəkdə yəqin ki, bizim qazımız da onlar üçün maraqlı olacaq”.
GUAM ölkələrinin iqtisadi strukturlarının toplantısı başa çatandan sonra isə nəqliyyat nazirləri və işçi qrupları səviyyəsində müzakirələr başlayıb. Nəqliyyat Nazirliyinin nəqliyyat siyasəti və iqtisadiyyat şöbəsinin müdiri Sədrəddin Məmmədovun “APA-Economics”ə verdiyi məlumata görə, iclasda nəqliyyat sahəsində əməkdaşlığın genişləndirilməsi, gələcək layihələr, mövcud maneələrin aradan qaldırılması və multimodal yük daşımaları ilə bağlı məsələlər müzakirə olunub. Müzakirələrin nəticəsi olaraq, GUAM ölkələri arasında multimodal yük daşımaları sahəsində çoxtərəfli sazişin imzalanması planlaşdırılır.
GUAM ölkələri hüquq-mühafizə orqanlarının başçılarının, milli təhlükəsizlik, daxili işlər, fövqəladə hallar, baş prokurorlar, sərhəd xidmətləri rəhbərlərinin də toplantıları da keçirilib. Görüşdən sonra açıqlama verən Ukrayna baş prokurorunun müavini Viktor Pşonka iclasda GUAM ölkələrinin terrorla mübarizə sahəsində əməkdaşlıq imkanları və bir sıra digər məsələlər müzakirə olunduğunu deyib.
GUAM ölkələrinin hüquq-mühafizə orqanları rəhbərlərinin görüşü ilə bağlı etibarlı mənbənin APA-ya verdiyi məlumata görə, görüşdə terrorizm və narkomaniya ilə mübarizə, qarşılıqlı hüquqi yardım, quruma daxil olan ölkələr arasında ekstradisiya məsələləri, cinayətkarlığa qarşı birgə mübarizə metodları ilə bağlı danışıqlar aparılıb. Razılaşdırılan məsələlərlə bağlı birgə razılıq protokolu imzalanıb.
Bu gün həmçinin GUAM ölkələrinin humanitar strukturlarının, yəni təhsil, mədəniyyət, turizm, gənclər və idman, həmçinin Elmlər Akademiyaları rəhbərləri də görüşü keçirilib. Azərbaycanın mədəniyyət və turizm naziri Əbülfəs Qarayev iclasda GUAM ölkələri arasında əməkdaşlıq məsələlərinin müzakirə olunduğunu bildirib: “Toplantıda əməkdaşlıq imkanları yüksək qiymətləndirildi. Çünki GUAM ölkələri arasında humanitar sahədə əməkdaşlıq əvvəldən də mövcud olub. Digər tərəfdən, bizim aramızda heç bir fikir ayrılığı olmadığından, əməkdaşlıq üçün ciddi imkanlar var”. Ə. Qarayevin sözlərinə görə, iclasda GUAM ölkələrinin beynəlxalq sərgilərdə birgə layihələrlə iştirakı məsələsi də müzakirə olunub: “Çalışmalıyıq ki, GUAM-ın bu sahədə formalaşmış xüsusi imici olsun”.
Bu gün GUAM-ın işgüzar şurası da toplaşıb.
GUAM ölkələri xarici işlər nazirlərinin görüşü də artıq keçirilib. Hazırda GUAM ölkələrin XİN başçılarının ABŞ-la apardıqları danışıqlar başlayıb. Danışıqlardan öncə ABŞ dövlət katibinin müşaviri Denk Krammer bu görüşün ABŞ-GUAM formatında keçirilən növbəti görüş olduğunu deyib: “Bu görüşlərdə ABŞ-la GUAM arasında münasibətlər və əməkdaşlıq məsələləri müzakirə olunur”. D. Krammer bəyan edib ki, ABŞ GUAM-a daxil olmaq niyyətində deyil: “Çünki GUAM regional təşkilatdır. Biz GUAM-dakı müşahidəçi statusumuzdan razıyıq və GUAM-ın inkişafını dəstəkləyirik. ABŞ GUAM-ın getdikcə möhkəmlənməsindən və nüfuzunun artmasından məmnundur”.
Bunun ardınca isə Polşa və Yaponiyanın nümayəndələri ilə qurumla əməkdaşlıq perspektivlərinə dair danışıqlar aparacaqlar. Günün ikinci yarısında həmçinin GUAM ölkələri rəhbərlərinin Bakıda təkbətək görüşləri də nəzərdə tutulub. Çərşənbə axşamı isə GUAM-ın əsas sammiti və sənədlərin imzalanma mərasimi keçiriləcək.
Qeyd edək ki, GUAM-ın Bakıda keçirilən sammitində bir sıra sənədlərin imzalanacağı gözlənilir. Sammitdə Bakı Deklorasiyası, GUAM-ın ikinci sammitinin kommunikesi, GUAM-ın imtiyazları və immunitetləri haqqında saziş, nüvə və radiasiya təhlükəsizliyi məsələləri üzrə əməkdaşlıq və yardım haqqında memorandum, GUAM- Polşa birgə bəyanatının qəbul ediləcəyi gözlənilir.
Onu da qeyd edək ki, GUAM sammiti çərçivəsində bütün görüşlər qapalı keçirilib. Jurnalistlər heç bir tədbirə buraxılmayıb və onların informasiya almaları üçün şərait yaradılmayıb.

Xatırladaq ki, sammitdə Gürcüstan prezidenti Mixail Saakaşvili, Litva prezidenti Valdas Adamkus, Ukrayna prezidenti Viktor Yuşşenko, Moldovanın baş naziri Vasil Tarlev iştirak edəcək. /APA/