Daxili siyasət

Ana səhifə

Daxili siyasət

Metyu Brayza ilə Zeyno Baranın toyunda Elmar Məmmədyarovla yanaşı, Azərbaycandan daha bir neçə rəsmi şəxs iştirak edib

27 avqust 2007 08:44 (UTC +04:00)

APA-nın ABŞ bürosunun mərasimə qatılan amerikalı qonaqlara istinadən yaydığı məlumata görə, toyda Azərbaycanın xarici işlər naziri Elmar Məmmədyarov, Azərbaycanın Los-Ancelesdə baş konsulu Elin Süleymanov, iqtisadi inkişaf naziri Heydər Babayev, ARDNŞ-in prezidenti Rövnəq Abdullayev, Milli Məclisin vitse-spikeri Valeh Ələsgərov, Demokratik İslahatlar Partiyasının sədri Asim Mollazadə və onun qardaşı Ceyhun Mollazadə iştirak ediblər. Bundan başqa toyda Gürcüstanın BMT-də daimi nümayəndəliyinin rəhbəri İrakli Alasaniya, Tiflis meri Qiqi Uqulava, ABŞ-ın Gürcüstandakı səfiri Con Taft, Türkiyənin Azərbaycandakı keçmiş səfiri, Türkiyə Xarici İşlər Nazirliyinin aparat rəhbərinin müavini Əhməd Ünal Çeviköz, Avropa Birliyinin Cənubi Qafqaz üzrə xüsusi nümayəndəsi Piter Semnebi, MHP millət vəkili Gündüz Aktan da iştirak ediblər. Mərasimə Ermənistandan da bir neçə nəfər qeyri-hökumət təşkilatının rəhbərləri qatılıb.
Amerikalı qonaqlar qeyd ediblər ki, Metyu Brayza və Zeyno Baran toya iştirakçıları şəxsi dostluq münasibətlərinə görə dəvət ediblər. Bəylə gəlin vurğulayıblar ki, onlar əziz günlərini əsl dostlar arasında qeyd etmək istəyiblər. Maraqlıdır ki, mərasimdə xarici işlər naziri Elmar Məmmədyarov həm bəy, həm də gəlin tərəfdən yeganə sağdış olub. Bəylə gəlinin digər sağdışları isə yaxın qohumları olub. Toy mərasimi bir sıra maraqlı hadisə və bəyanatlarla yadda qalıb. Mərasimdə ilk öncə dövlət başçılarının, o cümlədən Azərbaycan prezidenti İlham Əliyevin təbrik məktubu oxunub. Təbrik məktubları oxunduqdan sonra çıxış edən Metyu Brayza bildirib ki, bu gün yaşadığı xoş günlərə görə
regionda reallaşdırılan qlobal enerji layihələrinin müəlliflərinə minnətdardır: “Bu layihələr mənimlə Zeyno Baranın həyatında müstəsna rol oynayıb. Biz hər ikimiz Stanford Universitetini bitirsək də, tale yollarımız bizi məhz strateji enerji layihələri üzərində işləyərkən rastlaşdırıb”. Zeyno Baran isə zarafatla əlavə edib ki, bu gün Bakı-Tiflis-Ceyhan layihəsi olmasaydı, toy mərasimlərini Bosforda keçirə bilməyəcəkdilər. O bildirib ki, məhz qeyd olunan layihə işə düşdükdən sonra boğazda yükdaşımalar azalıb, ekoloji vəziyyət yaxşılaşıb. Yeni ailə quranlar toydan yığılacaq pul və hədiyyələri Türkiyənin “Baba, məni məktəbə göndər” ictimai xeyriyyə fonduna keçirmələrini xahiş ediblər. Qeyd edək ki, bu fond kasıb ailələrdən olan məktəbli uşaqlara maddi yardım göstərir. 3 gün davam edən toy mərasiminin bir hissəsi Bosfor boğazında, digər hissəsi isə İstanbulun Quruçeşmə adasındakı “Suada” əyləncə mərkəzində keçirilib. /APA/