Daxili siyasət

Daxili siyasət

Sabir Rüstəmxanlı İranda türklərə qarşı yönələn diskriminasiya siyasətinə etiraz olaraq, Milli Məclisin Azərbaycan-İran Dostluq qrupundan çıxıb

18 sentyabr 2007 14:57 (UTC +04:00)

“Özünü Azərbaycan xalqının problemləri ilə məşğul olan kimi cəmiyyətə təqdim edən bəzi müxalifət partiyalar Güney Azərbaycanda, o cümlədən İranda yaşayan türklərin hüquqlarının qorunması üçün heç bir fəaliyyət göstərmir”. Bu sözləri APA-ya açıqlamasında Vətəndaş Həmrəyliyi Partiyasının (VHP) sədri Sabir Rüstəmxanlı deyib. O bildirib ki, həmin partiyalar nəzarətlərində olan qəzetlərin əsas səhifələrində şou materiallarına yer verdikləri halda, milyonlarla türkün problemi haqda bir cümlə belə yazmaq istəmirlər: “Azərbaycanda beynəlxalq hüquq normalarından danışan şəxslər İran türklərinin pozulan haqları haqda bir dəfə də olsun, beynəlxalq qurumlara müraciət etməyiblər. Əksinə, İran və digər dövlətlərin səfirlikləri ilə isti münasibət qurmağa çalışırlar”. S. Rüstəmxanlı İranda türklərə qarşı yönələn diskriminasiya siyasətinə etiraz olaraq, Milli Məclisin Azərbaycan-İran Dostluq qrupundan çıxdığını da deyib: “İranda türklərə məxsus bütün abidələr və mədəniyyət nümunələri fars adı ilə təqdim edilir. Əsas göstərilir ki, ölkədə hamı şiə-müsəlmanıdır. İran türklərinə qarşı olan bu münasibət Azərbaycan cəmiyyəti tərəfindən cavabsız qalmamalı və bütün partiyalar mübarizə aparmalıdırlar”. /APA/