Daxili siyasət

Daxili siyasət

Araz Əzimov: “Stansiyanın yalnız ABŞ-ın istifadəyə verilməsi məsələsi hələlik müzakirə olunmur”

19 sentyabr 2007 12:02 (UTC +04:00)

Onun sözlərinə görə, bu şərt Qəbələ RLS-in icarəsinə dair Rusiya ilə imzalanmış müqavilədə də öz əksini tapıb: “Stansiyanın gələcək taleyi hələlik məlum deyil. 2002-ci ildə imzalanmış müqaviləyə əsasən bu stansiya 2012-ci ilə kimi Rusiyanın istifadəsinə verilib. 2012-ci ildən sonra Rusiya bu obyekti icarəyə götürməyəcək və stansiya funksiyasını dayandıracaq. Yaxud ABŞ, Rusiya və Azərbaycan Qəbələ radiolokasiya stansiyasını birgə istifadə edəcək. Stansiyanın yalnız ABŞ-ın istifadəyə verilməsi məsələsi hələlik müzakirə olunmur. İlkin olaraq müəyyənləşdirmək lazımdır ki, bu stansiyanın hansı xeyri ola bilər və obyekt daha geniş sistemin tərkibində necə fəaliyyət göstərə bilər. Qəbələ RLS-in indiki istifadə rejiminin ABŞ raket hücumundan müdafiə sistemindən fərqlənməsi mümkündür. Belə olan halda stansiyanın yenidən qurulması tələb olunur”. Araz Əzimov qeyd edib ki, Azərbaycan ilk növbədə öz təhlükəsizliyi barədə düşünməlidir: “Bu stansiyanın dəyəri olduqca böyükdür. Onun yenidən qurulması da böyük əhəmiyyət daşıyır. Beynəlxalq səviyyədə Qəbələ RLS-in əhəmiyyəti arta və bu stansiyadan daha geniş formatda istifadə oluna bilər. Lakin bu, həm də risk səviyyəsini artırır. Bu stansiyanın gələcəkdə fəaliyyət göstərib-göstərməyəcəyi Rusiyanın digər analoji obyektlərinin fəaliyyətindən də asılıdır. Bəlkə, Qəbələ RLS Rusiyaya ümumiyyətlə lazım olmayacaq və ora yalnız Hollivud filmləri çəkməyə yarayacaq?”. Araz Əzimov İranın Qəbələ radiolokasiya stansiyası ilə bağlı narahatlığını anlamadığını deyib: “İran bizim qonşumuzdur və ölkələrimiz arasında münasibətlər inkişaf edir. Düzdür, bu ölkə ətrafında çətin durum yaransa da, biz ümid edirik ki, problem sülh yolu ilə həll olunacaq”. /APA/