Daxili siyasət

Daxili siyasət

NATO PA rəsmisi: “Azərbaycanın Avropaya inteqrasiyasına və problemlərinin həllinə köməklik göstərməyə hazırıq”

19 sentyabr 2007 15:39 (UTC +04:00)

NATO Parlament Assambleyasının (PA) Təhlükəsizliyin Mülki Ölçü Komitəsinin Demokratik İdarəçilik üzrə Alt Komitəsinin üzvləri Azərbaycan Milli Məclisinin Beynəlxalq münasibətlər və parlamentlərarası əlaqələr daimi komissiyasının üzvləri ilə görüş keçiriblər. APA-nın məlumatına görə, komissiyanın sədri Səməd Seyidov Azərbaycanın siyasi baxımdan öz qərarını verdiyini bildirib: “Bu qərar Avroatlantik məkana inteqrasiya ilə bağlıdır”. S. Seyidov Azərbaycan Milli Məclisinin bir çox beynəlxalq təşkilatlar, o cümlədən NATO Parlament Assambleyası ilə sıx əməkdaşlıq etməkdə maraqlı olduğunu vurğulayıb: “Biz ölkədə NATO standartlarını tətbiq etmək istəyirik. Digər tərəfdən, Azərbaycan Avropa enerji təhlükəsizliyi məsələlərində çox böyük rol oynayır. Ona görə də Şimali Atlantika Alyansı ilə bütün sahələrdə əlaqələrin inkişafında maraqlıyıq”.
Ç. Kazak NATO-nun Cənubi Qafqaz regionuna çox diqqətlə yanaşdığını bildirib: “Ötən illərdə təşkilata üzv olan bütün ölkələrin diqqətini bu regiona yönəltməklə buradakı problemlərin həllinə çalışırıq”. Qonaq Azərbaycanda müxtəlif sahələrdə əldə olunmuş nailiyyətlərdən məmnunluğunu ifadə edib: “Belə davam edərsə, Azərbaycanı daha parlaq gələcək gözləyir. Azərbaycanın Avropaya inteqrasiyasına və problemlərinin həllinə köməklik göstərməyə hazırıq”.
Görüşdə Dağlıq Qarabağ münaqişəsi, Azərbaycanın Avropaya inteqrasiyası və digər məsələlər ətrafında geniş fikir mübadiləsi aparılıb. S. Seyidov Dağlıq Qarabağ münaqişəsinin həlli üçün Avropa Şurasının təzyiq mexanizmlərindən istifadə etməməsindən təəssüfləndiyini bildirib. /APA/