Daxili siyasət

Daxili siyasət

Ümid Partiyası Milli Birlik Hərəkatının seçki komissiyaları ilə bağlı təklifini iqtidarın mənafeyinə uyğun sayır

24 sentyabr 2007 11:59 (UTC +04:00)

Milli Birlik Hərəkatının (MBH) seçki komissiyalarının 5 siyasi partiya tərəfindən formalaşdırılması ilə bağlı təklifi iqtidarın mənafeyinə uyğundur. APA-nın məlumatına görə, bunu Ümid Partiyası sədrinin ideoloji təbliğat məsələləri üzrə müavini Ənvər Ağazadə bildirib. Sədr müavini partiyanın mətbuat xidmətinə açıqlamasında MBH-nin təklifinin mahiyyət etibarilə hakimiyyətin irəli sürdüyü təkliflərdən fərqlənmədiyini qeyd edib: “İqtidar imkanı çatdığı bütün sahələri monopoliyada saxlamağa çalışdığı kimi, bəzi müxalifət partiyaları da müxalifət düşərgəsini monopoliyada saxlamağa çalışır”. Ə. Ağazadənin sözlərinə görə, təklifdə 60-dan yuxarı dairədən namizəd irəli sürmüş partiyaların komissiyaların formalaşdırılmasına cəlb olunması əksini tapıb: “Amma blok şəklində seçkilərə qatılan Müsavat, ADP və AXCP-nin heç birinin 60-dan çox namizədi olmayıb. Yalnız siyahı xatirinə 60 namizəd irəli sürən ALP-nin isə ümumi seçicilərin minimum 1 faizinin səsini toplaması şübhə doğurur”. Ə. Ağazadə MBH-nin son parlament seçkilərinin nəticələrini saxta saydığını xatırladıb və onların bu seçkilərin nəticələrinə istinad etmələrinin absurd olduğunu vurğulayıb. /APA/