Daxili siyasət

Daxili siyasət

Parçalanmış Kommunist Partiyasının tərəfləri ayrı-ayrılıqda qurultaya hazırlaşır

24 sentyabr 2007 12:07 (UTC +04:00)

“Partiyanı ələ keçirən Rüstəm Şahsuvarov və onun əlaltıları təşkilatın plenumuna Kommunist Partiyasının üzvü olmayan, muzdlu adamları toplamışdılar. Əsl plenum nümayəndələri isə qapı arxasında qalmışdı”. Azərbaycan Kommunist Partiyası Təşkilat Komitəsinin (AKP TK) sədri Rauf Qurbanov APA-ya bildirib ki, toplantıda ona qarşı əsasız ittihamlar səsləndirilib. Onun sözlərinə görə, oktyabrın 14-də R. Şahsuvarov və onun tərəfdarlarının keçirəcəyi qurultayda da analoji vəziyyət baş verəcək. Plenumu qeyri-legitim hesab edən R. Qurbanov bu şəxslərin partiyadan çıxarıldığını da açıqlayıb: “AKP Mərkəzi Komitəsinin fəaliyyəti dayandırılıb və bütün səlahiyyətlər Təşkilat Komitəsinə verilib. Gülnisə Məsimova Təşkilat Komitəsi sədrinin müavini seçilib”.
AKP-nin sədr əvəzi Rüstəm Şahsuvarov isə APA-ya açıqlamasında digər tərəfin fikirlərini qeyri-sağlam hesab edib: “Mərkəzi Komitənin fəaliyyətini 4-5 nəfərin iştirakı ilə keçirilən yığıncaqda dondurmaq olmaz. 70 plenum nümayəndəsindən 63-ü toplantıda iştirak edib. O ki qaldı Rauf Qurbanovun partiyadan çıxarılmasına, o, 1999-cu ildə partiyadan xaric edilib. Lakin mərhum sədr Ramiz Əhmədov onu bağışladıqdan sonra Milli Məclisə deputat seçilib. Amma bu məsələ 1999-cu ildəki məsələnin davamı deyil. Bir-iki nəfərin partiyadan getməsi isə AKP-nin parçalanması demək deyil”. /APA/