Daxili siyasət

Ana səhifə

Daxili siyasət

Gülüstan Sarayında “YAP: 15 il yüksəliş yolunda” mövzusunda konfrans keçirilir

20 noyabr 2007 09:17 (UTC +04:00)

APA-nın məlumatına görə, konfransı açıq elan edən YAP sədrinin müavini, partiyanın icra katibi Əli Əhmədov YAP-ın yaranma tarixindən danışıb. O, Azərbaycanın inkişafı üçün YAP-ın gördüyü işlərdən söz açıb: “Hazırda İlham Əliyevin rəhbərliyi ilə Azərbaycanın dinamik inkişafı davam edir”.
Daha sonra YAP sədrinin müavini Murtuz Ələsgərov “Heydər Əliyev yolu əbədidir” mövzusunda məruzə ilə çıxış edib. O, YAP yarandıqdan sonra ölkədə nəhəng layihələr həyata keçirildiyini, yeni ictimai-siyasi dəyərlərin formalaşdığını deyib: “Heydər Əliyev xalqa layiqli davamçı ərməğan etdi”.
YAP İdarə Heyətinin üzvü Zahid Qaralov “YAP tarixi zərurətdən yarandı”, təhsil naziri Misir Mərdanov “Davamlı inkişaf və təhsil”, Naxçıvan Dövlət Universitetinin rektoru İsa Həbibbəyli “YAP: Heydər Əliyevdən İlham Əliyevə” mövzusunda məruzə ilə çıxış ediblər.
Qeyd edək ki, fasilədən sonra konfrans bölmələrdə davam etdiriləcək. Birinci bölmə “YAP: zamanın tələbi, xalqın istəyi” adı altında Milli Məclisin komissiya sədri Arif Rəhimzadənin sədrliyi ilə, ikinci bölmə “YAP: Heydər Əliyev ideyalarının daşıyıcısı” adı altında MM-in komissiya sədri Eldar İbrahimovun sədrliyi ilə, üçüncü bölmə isə “Yeni zamanın, yeni liderin partiyası” adı altında Bakı Dövlət Universitetinin rektoru Abel Məhərrəmov sədrliyi ilə keçiriləcək. /APA/