Daxili siyasət

Ana səhifə

Daxili siyasət

Demokratiya Uğrunda İttifaq Müsavat, AXCP, ADP və ALP-ni saxta müxalifətçilikdə ittiham edib

05 dekabr 2007 15:37 (UTC +04:00)

“Azərbaycanda onlardan başqa real müxalifət qüvvəsi olmadığı haqda bəyanatlar verən Müsavat, AXCP, ADP və ALP-nin bu mövqeyi demokratik qüvvələri parçalamağa, seçki öncəsi cəmiyyətin ümidsizləşdirilməsinə hesablanıb. Adıçəkilən partiyaların hakimiyyətlə işbirliyində olması hamıya bəllidir”. Bu fikirlər Demokratiya Uğrunda İttifaqın (DUİ) bu gün yaydığı bəyanatdandır. Qurumun mətbuat xidmətindən APA-ya daxil olan bəyanatda sözügedən partiyaların liderlərinə heç bir inamın qalmadığı bildirilir. Bəyanatda DUİ-nin demokratik qüvvələrin bir araya gəlməsi, həqiqi demokratik seçkilərin keçirilməsi üçün cəmiyyətin aktivləşməsi istiqamətində addımlar atdığı bildirilir və bundan uzun müddət saxta müxalifətçilik etmiş partiyaların ciddi narahat olduğu vurğulanır: “Adıçəkilən partiyalar uzun illər ərzində, xüsusilə son seçkilərdə hakimiyyətin, eləcə də indiki hakimiyyətin qalmasında maraqlı olan beynəlxalq güclərin ayırdığı maliyyə əsasında saxta müxalifətçiliklə məşğul olublar. Bir-birinə qarşı ən ağır ifadələr söyləmiş bu şəxslərin yenidən heç nə olmamış kimi bir yerə toplanması onların hansı dəyərlərin daşıyıcısı olduğunu göstərir”. DUİ bu kimi mövqeni milli maraqları zidd olduğunu, cəmiyyətin əxlaqına mənfi təsir göstərdiyini, bütün demokratik qüvvələri gözdən salmağa yönəldiyini bildirib və həmin partiyaların liderlərini bu kimi vərdişlərdən çəkinməyə çağırıb. /APA/