Daxili siyasət

Ana səhifə

Daxili siyasət

Benita Ferrero-Valdner: “Avropa Komissiyası sülh sazişi imzalandıqdan sonra Dağlıq Qarabağda reabilitasiya işlərini aparmağa hazırdır” - EKSKLÜZİV

Benita Ferrero-Valdner: “Avropa Komissiyası sülh sazişi imzalandıqdan sonra Dağlıq Qarabağda reabilitasiya işlərini aparmağa hazırdır” - <font color=#FF0000>EKSKLÜZİV</font>

06 dekabr 2007 14:52 (UTC +04:00)

- Avropa Qonşuluq Siyasəti Azərbaycan baxımından özünü doğruldubmu?
- Avropa İttifaqı ilə Azərbaycan arasında ölkədəki islahatların dəstəklənməsi üçün əsas prioritetləri özünə daxil edən, ölkəni Avropa İttifaqına daha çox yaxınlaşdıran 5 illik iş proqramı olan Avropa Qonşuluq Siyasəti çərçivəsində Fəaliyyət Planı imzalanıb. Fəaliyyət Planının 2005-ci ildən icra edildiyi tərəfdaş ölkələrdə qazandığımız təcrübə onu göstərir ki, real islahatların öz təsirini tam göstərməsi üçün müəyyən zaman tələb olunduğuna baxmayaraq, bu siyasət müəyyən nəticələrə malikdir.
- Avropa Qonşuluq Siyasətinin əhatə dairəsi nə zaman genişlənəcək?
- Hazırda Avropa Qonşuluq Siyasətinin coğrafi miqyasını genişləndirmək üçün heç bir plan yoxdur. Fikrimcə, indi əsas məsələ Avropa Qonşuluq Siyasəti üzrə tərəfdaş ölkələrlə əlaqələri möhkəmləndirmək, müvafiq Fəaliyyət Planlarında müəyyən edilmiş məqsədlərin əldə edilməsi üçün onlarla ciddi əməkdaşlıq etməkdir. Bu o demək deyil ki, Avropa İttifaqı “qonşularının qonşuları” ilə əlaqələrin sıxlaşmasına cəhd göstərmir və ya qeyri-qanuni miqrasiya və ya enerji təhlükəsizliyi kimi Avropa Qonşuluq Siyasətinin coğrafi çərçivəsindən kənarda olan məsələlər məqsədli şəkildə həll edilə bilməz. Bu baxımdan iki mühüm təşəbbüsü qeyd etmək istərdim: Mərkəzi Asiya Strategiyası və Qara Dənizdə Sinerji təklifi hazırlanmışdır. Hər iki sənəd Avropa Qonşuluq Siyasətinin coğrafi ərazisindən tam və ya qismən kənarda qalan regionlarla daha yaxın regional əməkdaşlıq məqsədi güdür.
- Avropa İttifaqının GUAM üzvü olan ölkələrdə icra edilən enerji layihələri ilə hansı əlaqəsi var?
- Regional inteqrasiyanın uğurlu nümunəsi kimi GUAM kimi regional əməkdaşlıq təşəbbüslərinə Avropa İttifaqı daha çox diqqət yetirir və biz onların işini yaxından izləyirik.
- Avropa İttifaqı GUAM-a daxil olan üzv ölkələrin inkişafını maliyyələşdirmək niyyətində idi. Bu proses nə zaman başlayacaq və hər ölkə üçün hansı məbləğdə vəsait ayrılacaq?
- Avropa Komissiyası müstəqillik əldə etdikdən sonra Gürcüstan, Ukrayna, Azərbaycan və Moldovanı yardım proqramları vasitəsilə dəstəkləməkdədir. Bu ildən isə Birliyin Avropa Qonşuluq Tərəfdaşlıq Aləti, Sabitlik Aləti və bir sıra tematik proqramlar kimi yeni yardım proqramları mövcuddur. Proqramların məqsədi tərəfdaş ölkələrdə gedən islahat prosesinə dəstək verməkdir. 2007-2013-cü illəri əhatə edən müddətdə təkcə Azərbaycan milli yardım proqramları çərçivəsində təqribən 92 milyon avro yardım alacaq.
- Avropa İttifaqı Avropa Qonşuluq Siyasətinə qoşulan ölkələr, o cümlədən Azərbaycanla viza rejimini dəyişməyi nəzərdə tuturmu?
- Bu siyasətin əsas elementi Avropa İttifaqı ilə Avropa Qonşuluq Siyasətinin tərəfdaş ölkələri arasında mobil əməkdaşlıq və mübadilənin artmasıdır. Buna görə də Avropa Komissiyası quruma üzv dövlətlərə qonşu ölkələrdən Avropa İttifaqına və əks istiqamətdə getmək üçün viza proseduralarını yüngülləşdirmək yollarını araşdırmağı təklif edib. Ancaq bu, qeyri-qanuni miqrasiya, sərhəd idarəçiliyi, qeyri-qanuni mühacirlərin təhvil verilməsi sazişləri və başqa sahələrdə əməkdaşlıq daxil olmaqla daha geniş paket kontekstində həll edilə bilər. Avropa İttifaqının viza rejimini dəyişməsi üçün bu quruma üzv dövlətlərinin yekdil qərar verməsi, eləcə də maraqlı ölkənin daha çox texniki mahiyyətli tədbirlər icra etməsini tələb edir. Avropa Qonşuluq Siyasəti çərçivəsində Fəaliyyət Planında bu məsələlərə dair Avropa İttifaqı və Azərbaycan arasında dialoqun qurulması nəzərdə tutulur. Ümidvaram ki, azərbaycanlı tərəfdaşlarımızla yaxın gələcəkdə bu müzakirələrə başlayacağıq.
- Avropa İttifaqı Dağlıq Qarabağ münaqişəsinin tənzimlənməsinə yardım etməyə hazır olduğunu bəyan edib. Bu qurum Azərbaycan ərazilərini azad etmək üçün Avropa Qonşuluq Siyasətinin iştirakçı ölkəsi kimi Ermənistana qarşı hər hansı tədbiri görə bilər?
- Avropa İttifaqının Dağlıq Qarabağ münaqişəsinə dair mövqeyi olduqca aydındır. Biz ATƏT-in Minsk Qrupunun vasitəçilik cəhdlərini tam dəstəkləyirik, bu uzun sürən münaqişənin sülh yolu ilə həlli məqsədilə danışıqlardan tam faydalanmaları üçün Ermənistan və Azərbaycanı təşviq edəcəyik. Avropa Komissiyası etimadın qurulması üçün tədbirləri dəstəkləməyə, sülh sazişi bağlanan kimi Dağlıq Qarabağ regionunda reabilitasiya işlərini aparmağa hazırdır.
- Avropa İttifaqı gələn il Azərbaycan keçiriləcək prezident seçkilərinə texniki yardım edəcəkmi?
- Biz doğrudan da ümid edirik ki, 2008-ci ilin prezident seçkiləri Azərbaycanın beynəlxalq öhdəliklərinə uyğun keçiriləcək. Texniki yardıma gəldikdə 2003-cü ilin prezident və 2005-ci ilin parlament seçkilərində olduğu kimi biz ATƏT-in Demokratik Təsisatlar və İnsan Haqları Bürosu vasitəsilə lazımi yardım göstərəcəyik. /APA/