Daxili siyasət

Ana səhifə

Daxili siyasət

Elmar Məmmədyarov: “Ərazi bütövlüyü problemini hərbi yolla həll etməyin mümkün olduğunu düşünmək yanlışdır” - EKSKLÜZİV

Elmar Məmmədyarov: “Ərazi bütövlüyü problemini hərbi yolla həll etməyin mümkün olduğunu düşünmək yanlışdır” - <font color=#FF0000>EKSKLÜZİV</font>

07 dekabr 2007 07:05 (UTC +04:00)

- Azərbaycanın ATƏT-dəki perspektivləri nədən ibarətdir?
- ATƏT təhlükəsizlik, demokratik cəmiyyət quruculuğu, islahatların dəstəklənməsi, mülki cəmiyyətin qurulması kimi məsələlərə toxunan kifayət qədər çoxtərəfli təşkilatdır. Bütün bu məsələlər Azərbaycan üçün maraqlıdır və ölkəmizin ATƏT-lə əməkdaşlıq perspektivini təşkil edir.
- Azərbaycan ATƏT-ə sədrlik etmək təşəbbüsü ilə çıxış etməyi planlaşdırırmı?
- Azərbaycan bu kimi addımlar atmağı planlaşdırmır. Dağlıq Qarabağ münaqişəsinin mövcudluğunu nəzərə alsaq, bu kimi təşəbbüsün irəli sürülməsinin məqsədəuyğun olduğunu söyləmək ümumiyyətlə çətindir. Biz Qazaxıstanın ATƏT-ə sədrlik etmək təşəbbüsünü dəstəklədik, hesab edirik ki, postsovet məkanı ölkələrindən hansısa birinin bu quruma sədrlik etməsinin vaxtı çoxdan çatıb.
- GUAM ölkələrində “dondurulmuş münaqişələr”lə bağlı quruma üzv dövlətlərin BMT Baş Assambleyasına qətnamə təqdim etməsi ətrafında vəziyyət nə yerdədir? Bu məsələnin BMT Baş Assambleyasının 63-cü sessiyasının müzakirəsinə saxlanılması mümkündürmü?
- Hazırda bu məsələ təkcə Azərbaycanın qərarı, yaxud istəyindən asılı deyil. Qeyd olunan məsələ GUAM-a üzv digər ölkələrin xarici işlər nazirləri ilə konsensus şəklində hazırlanıb. Bu kontekstdə GUAM ölkələrinin fikir mübadiləsi aparması zəruridir. GUAM ölkələrində “dondurulmuş münaqişələr”lə bağlı məsələ GUAM Xarici İşlər Nazirləri Şurasının Madriddə keçirilən toplantısında da müzakirə olunub.
- Dağlıq Qarabağ münaqişəsinin nizamlanması prosesi hazırda hansı mərhələdədir? Prezidentlərin Sankt-Peterburq görüşündən sonra vəziyyətin sıfır nöqtəsinə qayıtdığını söyləmək olarmı?
- Bu məsələdə hər şey Ermənistanın siyasi iradə nümayiş etdirməsindən asılıdır. Burada məsələnin mahiyyəti daha çox maarifləndirici xarakter daşıyır. Biz Ermənistandan olan həmkarlarımızı başa salmalıyıq ki, onların hazırda yürütdüyü siyasət, o cümlədən ərazilərin işğal olunması, insanların yurd-yuvalarından zorla qovaraq məcburi köçkün və qaçqına çevrilməsi siyasəti tamamilə yanlışdır. Bu, ilk növbədə, ölkənin milli maraqları, regional əlaqələrin normal funksiya göstərməsi və inkişafı, regionun təhlükəsizliyinin təminatı baxımından qeyri-məhsuldar siyasətdir. Onlar bunu nə qədər tez anlasalar, hamı üçün bir o qədər yaxşı olar.
- Perspektivdə Azərbaycan və Ermənistan prezidentlərinin görüşü nəzərdə tutulurmu?
- Bu məsələ mənim həmsədrlər və Ermənistanın xarici işlər naziri Vardan Oskanyanla görüşümdə müzakirə olunmayıb.
- Azərbaycan və Ermənistanda prezident seçkiləri yaxınlaşır. Belə fikir var ki, bu seçkilər danışıqlar prosesində “taym-aut”a səbəb olacaq...
- Seçkilər şübhəsiz ki, həmişə bu kimi proseslərə öz təsirini göstərir. Seçkilər iki icma, dövlət, millət arasında danışıqlar kimi məsələlər fonunda çox həssas proses hesab olunur. Hesab edirəm ki, bu seçkilər də prosesə təsirsiz ötüşməyəcək. Lakin prosesi dayandırmaq olmaz proses getməli, biz danışıqları davam etdirməliyik. Digər məsələ isə odur ki, biz hər zaman erməni tərəfini bu və ya digər metodlarla konstruktivliyə çəkməliyik. Erməni tərəfini hər zaman konstruktiv mövqeyə dəvət etmək, onlara bu məsələnin ilk növbədə Ermənistanın milli maraqlarına ciddi şəkildə cavab verməli olduğunu izah etmək lazım gəlir. Bir məsələni də əlavə etmək istərdim ki, dövlətin ərazi bütövlüyü problemini hərbi yolla həll etməyin mümkünlüyünü düşünmək yanlışdır. Bu, məsələnin düzgün qoyuluşu deyil, bu addım bizi ərazi və digər bu kimi məsələlərin silah yolu ilə həll olunduğu 20-ci əsrin ortalarına qaytarardı.
- ATƏT-in mətbuat və söz azadlığı üzrə xüsusi nümayəndəsi Mikloş Haraşti Sizə Azərbaycanda söz azadlığının durumundan narahatlığını ifadə edən məktub göndərib. ABŞ dövlət katibinin müavini Daniel Frid də bu məsələni Azərbaycanın ABŞ-dakı səfiri ilə müzakirə edib. Yaranmış situasiya Azərbaycanın beynəlxalq imicinə mənfi təsir göstərmirmi?
- Hər şey bu məsələlərin necə təqdim olunmasından asılıdır. Əgər cəmiyyətin daxili inkişafı baxımından yanaşsaq, burada praqmatizm elementləri var. Jurnalistika daha peşəkar olmalıdır. Biz Xarici İşlər Nazirliyində xüsusi mətbuat xidməti formalaşdırmışıq, baş verənlər barədə ictimaiyyətə məlumat çatdırmaq üçün həftəlik brifinqlər keçiririk. ABŞ-da diplomatik fəaliyyətim zamanı topladığım təcrübədən çıxış edərək deyə bilərəm ki, “Washington Post”, “New York Times” kimi ciddi nəşrlər Azərbaycan haqqında məqalə yazarkən, yaxud ölkəmizlə bağlı hansısa məsələni işıqlandırarkən Azərbaycanın Vaşinqtondakı səfirliyinə zəng edərək informasiyanı dəqiqləşdirirdilər. Onlar bu addımı yanlış informasiya verməmək üçün atırdılar. Təəssüf ki, Azərbaycanda belə praktika mövcud deyil. Söhbət informasiyanın dəqiqləşdirilməsinin zəruriliyindən gedəndə isə bu, az qala azad mətbuata hücum kimi dəyərləndirilir. İkincisi, tam səmimi olaraq inanıram ki, Azərbaycanda söz azadlığının səviyyəsi digər postsovet məkanı respublikalarında mətbuat azadlığının səviyyəsindən aşağı deyil. Aydındır ki, Azərbaycanda jurnalistika məktəbi sahəsində çox ciddi problemlər var. Buna görə də biz Avropa İttifaqı, Avropa Şurası və ATƏT-dən olan həmkarlarımızla azərbaycanlı jurnalistlərin xarici ölkələrdə təcrübə keçməsini təmin etmək üçün xüsusi təqaüdlərin təsis olunması məsələsini müzakirə edirik. Azərbaycanlı jurnalistlər bu təqaüd proqramları hesabına xarici ölkələrdə öz peşəkarlığını artıra və bu sahəyə dair beynəlxalq standartları mənimsəyə bilərlər. Əlinə qələm alan hər kəsi jurnalist adlandırmaq olmaz. Jurnalistika məsuliyyət sevən peşədir, hətta deyərdim ki, xüsusi istedad tələb edən sahədir. /APA/