Daxili siyasət

Ana səhifə

Daxili siyasət

Sergey Lavrov: “Kosovonun statusu ilə bağlı qərar postsovet məkanındakı tanınmamış respublikalar üçün presedent olacaq”

07 dekabr 2007 15:51 (UTC +04:00)

APA-nın “RİA Novosti”yə istinadən verdiyi məlumata görə, Rusiyanın xarici işlər naziri Sergey Lavrov NATO-Rusiya Şurasının Brüsseldəki toplantısından sonra keçirdiyi mətbuat konfransında bu bəyanatla çıxış edib. O bildirib ki, Kosovoda situasiyanın inkişafını bir çox ölkə, o cümlədən Balkan dövlətləri diqqətlə izləyir: “Beynəlxalq hüquq, BMT Nizamnaməsi və Helsinki Yekun Aktı ilə istədiyi kimi davrananlar Avropada sabitliyə kömək etməyəcək və gözlənilməz nəticələrə səbəb olacaq sürüşkən yola ayaq basarkən bir daha düşünməlidir”. S. Lavrov Kosovonun müstəqilliyinə alternativ olmadığını söyləyənləri danışıqların qarşısını almamağa və tərəflərə ümumi mövqe tapmaq imkanı verməyə çağırıb.
Xatırladaq ki, 1999-cu ildən Kosovo formal olaraq Serbiyanın ərazisi sayılır və BMT tərəfindən idarə olunur. 2006-cı ildə BMT baş katibinin xüsusi elçisi Marti Axtisaarinin vasitəçiliyi ilə aparılmış danışıqlar nəticəsiz bitdikdən sonra problemin həlli Rusiya, ABŞ və Avropa Birliyi nümayəndələrindən ibarət “troyka”ya həvalə olunub. “Troyka”nın da əyalətin statusuna dair apardığı danışıqlar nəticə verməyib. Qrup bununla bağlı BMT Təhlükəsizlik Şurasına hesabat təqdim etdikdən sonra Kosovonun birtərəfli qaydada öz müstəqilliyini elan edəcəyi gözlənilir. /APA/