Daxili siyasət

Ana səhifə

Daxili siyasət

Ahıska türklərinin Gürcüstanda qeydiyyatdan keçən Qayıdış və İnkişaf Fondunun təqdimat mərasimi olacaq

11 dekabr 2007 13:42 (UTC +04:00)

Ahıska türklərinin Gürcüstandakı öz tarixi torpaqlarına dönüşü və qeydiyyatdan keçməsi ilə bağlı ciddi problem yoxdur. Ahıska türklərinin “Vətən” Cəmiyyətinin Bakı ofisinin rəhbəri İbrahim Burhanov APA-ya bildirib ki, Ahıska türklərinin Gürcüstandakı ofisi öz tarixi torpaqlarına dönən şəxslərə köməklik göstərir: “Millət vəkili Qənirə Paşayeva ilə birlikdə biz özümüz də orada olduq. Qənirə xanım yeni köçən ailələrə humanitar yardım göstərdi”. Artıq 27 ailənin öz torpaqlarına döndüyünü söyləyən İ. Burhanov deyib ki, həmin şəxslər aldıqları evləri notarial qaydada sənədləşdirilə bilib: “Çoxlu sayda insan ev alsa da, qeydiyyat prosesi hələ başa çatmayıb”. Ahıska türklərinin öz tarixi torpaqlarına rəsmi dönüşünün yanvarın 1-dən başlanacağını xatırladan İ. Burhanovun sözlərinə görə, qayıdış tədricən yekunlaşacaq: “Təbii ki, geri dönən insanların orada birdən-birə yenidənqurma işləri aparması çətin olacaq. Geri dönən şəxslərin 90 faizi imkansızdır. Cəmi on faiz öz insan hesabına ev alıb”.
İ. Burhanov yaxın vaxtlarda Ahıska türklərinin Gürcüstan Ədliyyə Nazirliyində qeydiyyatdan keçərək fəaliyyətə başlayan Qayıdış və İnkişaf Fondunun təqdimat mərasiminin keçiriləcəyini də əlavə edib: “Təqdimat mərasimindən sonra biz müvafiq beynəlxalq təşkilatlara fondun adından müraciət edərək Ahıska türklərinin qayıdışına yardımçı olmalarını xahiş edəcəyik”. /APA/