Daxili siyasət

Ana səhifə

Daxili siyasət

Sergey Kuznetsov: “Venesiya Komissiyası Azərbaycanda seçki komissiyalarının paritet əsaslarla formalaşdırılmasına dair heç vaxt tövsiyə verməyib” - EKSKLÜZİV

25 fevral 2008 07:53 (UTC +04:00)

- Azərbaycan Seçki Məcəlləsinə dəyişikliklərlə bağlı rəsmi Bakı ilə Venesiya Komissiyası arasında müzakirələri bitmiş saymaq olarmı?
- Əgər söhbət bu ilin yazında Milli Məclisə təqdim olunacaq sənəddən gedirsə, müzakirələri bitmiş hesab etmək olar. Bizim artıq bu məsələ ilə bağlı işgüzar görüşlərimiz olmayacaq. Ümid edirəm ki, sənədin Milli Məclisdə müzakirəsi zamanı tövsiyələrimiz nəzərə alınacaq. Lakin biz ümumi əməkdaşlığı davam etdirəcəyik. Əməkdaşlığın hansı formada olacağını isə gələcək göstərəcək. Belə ki, Azərbaycanda bu il seçkilər keçiriləcək, müəyyən hadisələr baş verəcək, təbii ki, biz də bir neçə proqramda iştirak edəcəyik. Mərkəzi Seçki Komissiyası ilə də əməkdaşlığı davam etdirəcəyik.
- Azərbaycan tərəfi Bakıda keçirilmiş sonuncu müzakirələrin uğurlu alındığını bildirib. Siz də belə hesab edirsinizmi?
- Doğrudan da bizim işçi qrup çərçivəsindəki işlərimiz kifayət qədər uğurlu və konstruktiv oldu. Lakin bu o demək deyil ki, bütün problemləri artıq həll etmişik. Bəzi məqamlara dair mövqelərimizdə müəyyən fərqli baxışlar qalmaqdadır. Umud edirik ki, qanun layihəsi Milli Məclisə çıxarılarkən Bakıda sonuncu müzakirələr zamanı səslənən fikirlər və bizim bu məsələlərdəki mövqeyimiz də nəzərə alınacaq.
- Azərbaycan hökuməti Venesiya Komissiyasının Seçki Məcəlləsinə dəyişikliklərlə bağlı bütün tövsiyələrini nəzərə alıbmı?
- Öncə qeyd etməliyəm ki, biz hüquqşünaslar üçün bütün məsələlər texniki xarakter daşıyır. Biz qanun üzərində işləyirik və söhbət əgər qanundan gedirsə, burda hər bir detal vacib sayılır. Çünki hətta hansısa kiçik məqamlar belə qanunun tətbiqi zamanı kifayət qədər əhəmiyyətli dəyişikliklərə gətirib çıxara bilər. Sonuncu dəfə Bakıda keçirilən görüşlərdə seçki komissiyalarının formalaşması məsələsində müəyyən narahatlığımızın olduğunu bir daha vurğuladıq. Bu görüşlərdə bir çox siyasi qüvvələr iştirak edirdi və çox maraqlı təkliflər vardı. Həmin görüşlərdə biz ümumilikdə bütün məsələləri müzakirə etdik və fikrimcə, bəzi məsələlərdə müəyyən irəliləyişlərə nail olundu. Lakin təəssüflə qeyd etməliyəm ki, tövsiyələrimizin hamısı nəzərə alınmadı. Bəzi məsələlər hələ də qalmaqdadır. Məhz buna görə ümid edirik ki, bizim öncədən verdiyimiz və Bakıdakı sonuncu dəyirmi masanın nəticəsi kimi ortaya çıxan tövsiyələr Milli Məclisdə müzakirə ediləcək.
- Azərbaycan hökuməti ilə Venesiya Komissiyası arasında aparılan müzakirələrin yekununda məlum oldu ki, seçki komissiyalarının paritet əsaslarla formalaşdırılması məsələsinə dair dəyişiklik baş vermədi. Venesiya Komissiyası, ümumiyyətlə, komissiyaların paritet əsaslarla formalaşdırılması təklifini irəli sürmüşdümü?
- Komissiyaların formalaşması məsələsi seçki prosesinin iştirakçıları tərəfindən həll edilməlidir. Bunu Venesiya Komissiyasından gözləmək lazım deyil. Biz həmişə elə bir komissiyanın formalaşdırılmasını istəmişik ki, bu komissiyalar həm siyasi qüvvələrin etibarını qazana, eyni zamanda səmərəli formada işləyə bilsin. Biz bu strukturun hansı formada olduğuna, yəni paritet, yaxud hansısa digər elementlərin istifadəsi ilə formalaşdırılmasına dair heç vaxt tövsiyə verməmişik. Biz bir neçə dəfə qeyd etmişdik ki, komissiyalar seçkilərdə iştirak edən bütün qüvvələrin etibarını qazanmalıdır. Bu alınmadığı üçün hökumət nümayəndələrinin diqqətini dəfələrlə bu məsələyə yönəltmiş, bu məsələnin hansısa yolla həll etmək zərurətini onlara çatdırmışıq. Biz özümüz də bu məsələdə hər hansı təklifi baxışdan keçirməyə hazırıq. Bununla bağlı Bakıda dəyirmi masa da təşkil olunmuşdu. Həmin tədbirdə həm siyasi qüvvələr, həm QHT-lər tərəfindən bu problemin mümkün həllinə dair bir çox təklif irəli sürüldü. Müzakirələrin nəticələri qanun layihəsinin sonuncu variantında da əksini tapıb. Deyə bilərəm ki, həmin müzakirələrdə kifayət qədər maraqlı və ən əsası, reallaşdırılması mümkün olan təkliflər səsləndi. Lakin mən bir də vurğulamaq istərdim ki, nə Venesiya Komissiyası, nə də ATƏT-in Demokratik Təsisatlar və İnsan Haqları Bürosunun rolu qanun yazmaqdan ibarətdir. Biz, sadəcə öz fikrimizi bildirə bilərik ki, görüşlər zamanı da bir çox maraqlı və həyata keçirilə biləcək təkliflərin olduğunu bəzi məqamlarda qarşı tərəfin diqqətinə çatdırmışıq.
- Seçkilərdən sonra şikayətlərə baxılması məsələsində hansı yeniliklər tətbiq oluna bilər?
- Müzakirələr zamani şikayətlərə baxılması məsələsində ümumi razılığa gəldik və ümid edirik ki, bu, qanunda da əksini tapacaq. Əgər bu məsələ qanunda razılaşdırdığımız şəkildə əksini tapsa, şikayətlərə baxılma prosedurunun daha da şəffaf olmasına zəmin yaranacaq. Qərarlar tez və operativ qəbul oluna biləcək, həmçinin qərarların qəbulu zamanı ümumavropa standartlarının nəzərə alınması mümkün olacaq.
- Azərbaycan müxalifətinin təklifləri necə, nəzərə alındımı?
- Biz müzakirələr zamani həmişə müxalifətdən aldığımız mətnlərdən yararlanmışıq. Ekspertlərimiz müxalifətin təqdim etdiyi sənədlərlə yaxından tanış olurlar və deməliyəm ki, həmin sənədlərdə bir çox maraqlı və həyata keçirilməsi mümkün olan təkliflər var. Biz də apardığımız dialoqlarda təbii ki, bu məqamları nəzərə alırdıq. Həm dəyirmi masada iştirak edən, həm də iştirak edə bilməyən siyasi qüvvələrin fikirlərini nəzərə almışıq.
- “Sərbəst toplaşma azadlığı haqqında” qanuna dəyişikliklərlə bağlı vəziyyət nə yerdədir? Bu məsələ ilə də bağlı məsləhətləşmələri yekunlaşmış saymaq olarmı?
- Venesiya Komissiyasının ötən ilin dekabrında keçirilmiş sessiyasında bu qanun layihəsi ilə bağlı müsbət hesab edilə biləcək rəy çıxarılıb. Biz öz fikrimizi bildirmişik, indi isə hakimiyyət rəsmlərinin buna münasibətini gözləyirik. Biz çox ümid edirik ki, Milli Məclisə təqdim olunan layihəyə elə bir ciddi dəyişikliklər edilməyəcək.