Daxili siyasət

Ana səhifə

Daxili siyasət

İxtisaslaşmış ailə, qadın və uşaq məsələləri qrupundan üç nəfər Qeyri-Hökumət Təşkilatlarına Dövlət Dəstəyi Şurasının üzvlüyünə namizəd seçilib

12 mart 2008 11:19 (UTC +04:00)

Bakı. Ramil Məmmədli-APA. Prezident yanında Qeyri-Hökumət Təşkilatlarına Dövlət Dəstəyi Şurasının üzvlüyünə namizədlərin seçilməsi məqsədilə ixtisaslaşmış ailə, qadın və uşaq məsələləri qrupunun yığıncağı keçirilib. APA-nın məlumatına görə, Prezidentin İcra Aparatının (PİA) ictimai-siyasi şöbəsinin sektor müdiri Tahir Süleymanov prezident İlham Əliyevin 2007-ci ilin dekabrın 13-də QHT-lərə Dövlət Dəstəyi haqqında Əsasnaməni təsdiq etdiyini və bundan sonra Prezident yanında QHT-lərə Dövlət Dəstəyi Şurasının yaradılması istiqamətində müvafiq addımlar atıldığını deyib. Onun sözlərinə görə, bu günə qədər şurada təmsil olunmaq üçün Prezidentin İcra Aparatına 500 QHT müraciət edib və 414 QHT-nin seçkilərdə iştirakı barədə qərar qəbul olunub. Sonra iclasın sədri, katibi və say komissiyası seçilib. Gizli səsvermə nəticəsində Gender və İnsan Hüquqları Araşdırma Birliyinin sədri Rəna Mirzəzadə, “Nur” Uşaq və Gənclər Birliyinin sədri Sevinc Muradova və “Dan” Beynəlmiləlçi Gənclər İctimai Birliyinin sədri Gülarə Teymurova qadın və uşaq məsələləri qrupundan Şuraya üzvlüyünə namizəd seçiliblər. Qeyd edək prezidentin sərəncamı əsasında yaradılan Qeyri-hökumət Təşkilatlarına (QHT) Dövlət Dəstəyi Şurasının tərkibinə 8 QHT və 3 hökumət nümayəndəsi daxil ediləcək. Bundan sonra qeydiyyat prosesi başlayacaq və nümayəndələr aidiyyatı üzrə sektorlarda təmsil olunacaqlar. Şuranın sədri, müavini və katibi seçki yolu ilə müəyyənləşəcək. Hər Şura üzvü 4 il müddətinə seçiləcək, qurumun sədri isə 2 ildən bir dəyişdiriləcək.