Daxili siyasət

Ana səhifə

Daxili siyasət

Müsavat Partiyası “Buxarest sammiti ərəfəsi: Azərbaycan və NATO münasibətləri” mövzusunda dəyirmi masa keçirib

17 mart 2008 11:20 (UTC +04:00)

Bakı. Elnur Məmmədli APA. Bu gün Müsavat Partiyasının təşkilatçılığı ilə “Buxarest sammiti ərəfəsi: Azərbaycan və NATO münasibətləri” mövzusunda dəyirmi masa keçirilib. APA-nın məlumatına görə, tədbirdə partiya rəhbərliyi, politoloqlar və ehtiyatda olan hərbçilər iştirak edib. Müsavat başqanı İsa Qəmbər bu ilin yanvarında partiyanın Məclisində bəyanat qəbul edərək, Azərbaycan hakimiyyətini NATO-ya üzvlüklə bağlı rəsmi müraciət etməyə çağırdıqlarını xatırladıb. O bildirib ki, hazırda Azərbaycanın NATO-ya üzv olmasına böyük ehtiyac yaranıb və bu, ölkə üçün həyati dərəcədə əhəmiyyətlidir: “NATO-ya üzv olmaqla Azərbaycanda siyasi və iqtisadi azadlıqlar beynəlxalq standartlara uyğunlaşdırılacaq. Biz ümumilikdə Cənubi Qafqazın bu yöndə seçim etməsini istəyirik. Çünki bu, regiondakı konfliktlərin də həllinə yardım edər”. İsa Qəmbər hələlik Azərbaycan hakimiyyətinin NATO-ya üzvlük istiqamətində hər hansı addım atmadığını və rəsmi müraciət etməyə hazırlaşmadığını söyləyib. Onun sözlərinə görə, Buxarest sammitinə hələ xeyli vaxt var və hakimiyyət üzvlük üçün NATO-ya rəsmi müraciət edə bilər. Müsavat Məclisinin sədri Sülhəddin Əkbər də hakimiyyətin NATO-ya üzv olub-olmamaqla bağlı mövqeyini hələ dəqiqləşdirmədiyini vurğulayıb. Ehtiyatda olan polkovnik İldırım Məmmədov, politoloqlar Zəfər Quliyev və Qabil Hüseynli çıxışlarında NATO-ya inteqrasiyanın sürətləndirilməsinin vacib olduğunu qeyb ediblər. Ehtiyatda olan hərbçi Ələkbər Məmmədov isə bildirib ki, əslində NATO-ya üzvlük siyasi məsələdir: “Amma hakimiyyət öz siyasətini bu şəkildə davam etdirsə, perspektivdə NATO-ya üzvlük görünmür”.