Daxili siyasət

Ana səhifə

Daxili siyasət

Şərqşünaslıq İnstitutunda 31 Mart - Azərbaycanlıların Soyqırımı Günü ilə əlaqədar tədbir keçirilib

30 mart 2008 14:31 (UTC +04:00)

Bakı. Laura Cəbrayıllı - APA. Bu gün Azərbaycan Milli Elmlər Akademiyasının Ziya Bünyadov adına Şərqşünaslıq İnstitutunda 31 Mart - Azərbaycanlıların Soyqırım Günü ilə əlaqədar tədbir keçirilib. APA-nın məlumatına görə, tədbiri giriş sözü ilə institutun direktoru, millət vəkili Gövhər Baxşəliyeva açıb. Arazın hər iki tayında azərbaycanlılara qarşı törədilən kütləvi qırğınları, qarətləri xatırladan G. Baxşəliyeva 1905-1907, 1918-1920-ci illərdə İrəvanda, Zəngəzurda, Tiflisdə, Bakıda, Qarabağda, Naxçıvanda, Qubada dinc əhaliyə amansız divan tutulduğunu, 1918-ci ilin 31 martında Bakıda 30 mindən çox azərbaycanlının qətlə yetirildiyini bildirib. Tarix elmləri doktoru Solmaz Rüstəmova-Tohidi 1918-ci ilin 15 iyulunda Azərbaycan hökuməti yanında yaradılmış Fövqəladə Təhqiqat Komissiyasının erməni cinayətlərinin açılması, bu hadisələri törədənlərin cəzalandırılması sahəsində gördüyü böyük işlərdən danışıb: “Ələkbər bəy Xasməmmədovun rəhbərlik etdiyi komissiyanın materialları 36 cilddən, 3500 səhifədən ibarətdir. Mart hadisələrinə görə ümumilikdə 194 cinayət işi açılıb, Bakıda 24 nəfər, Şamaxıda isə 100 nəfər həbs olunub”. Digər çıxışlarda da ermənilərin azərbaycanlılara qarşı törətdiyi cinayətlərin unudulmaması və dünya ictimaiyyətinə çatdırılması üçün səylərin artırılmasının vacibliyi vurğulanıb.