Daxili siyasət

Ana səhifə

Daxili siyasət

YAP Heydər Əliyevin anadan olmasının 85 illiyi ilə əlaqədar silsilə tədbirlər planı hazırlayıb

31 mart 2008 10:22 (UTC +04:00)

Bakı. Elnur Məmmədli APA. Yeni Azərbaycan Partiyası (YAP) Heydər Əliyevin anadan olmasının 85 illiyi ilə əlaqədar silsilə tədbirlər planı hazırlayıb. Partiyanın mətbuat xidmətindən APA-ya daxil olan məlumata görə, tədbirlər planı çərçivəsində Heydər Əliyev Fondu ilə birlikdə “Demokratiya və sabitlik naminə: əməkdaşlığın yeni imkanları” mövzusunda beynəlxalq konfrans keçiriləcək. Artıq bu istiqamətdə hazırlıqlar başlayıb. Fondla birlikdə H. Əliyevin həyat və fəaliyyətinə həsr olunmuş “Heydər Əliyev” multimedia CD-si hazırlanır və yubiley ərəfəsində işıq üzü görəcək. Bundan başqa, Təhsil Nazirliyi ilə birlikdə “Heydər Əliyev Olimpiadası” keçiriləcək. Aprel ayının sonunda Olimpiadaya yekun vurulması və qaliblərin mükafatlandırılması mərasiminin keçirilməsi planlaşdırılır. H. Əliyev irsinin öyrənilməsi və təbliğinə yönəlmiş “Heydər Əliyev və Azərbaycan” mövzusunda elmi konfrans təşkil ediləcək və konfransın materialları eyni adla kitab şəklində çap olunacaq. Partiya Mətbuat Şurası ilə birgə “Heydər Əliyev və Azərbaycan mətbuatı” adlı konfrans, “Heydər Əliyev irsini öyrənirik!” devizi altında bölgələrdə tədbirlər də keçirəcək. Aprel ayında yubiley tədbirlərinə qoşulan partiyanın gəncləri arasında futbol turnirinə start veriləcək və mayın 8-də Bakıda turnirin qalibi müəyyənləşəcək.